絲絲講場：鷹君爭產風波：羅老太唔住新酒店？因為……
世城系主席羅旭瑞尋日有新酒店開幕，大家當然把握機會問佢鷹君集團（00041）羅氏家族爭產風波有冇新進展啦。不過佢只係話，屋企嘅事，希望可以慢慢解決到，但一講到媽媽羅杜莉君，羅旭瑞立刻笑逐顏開，話羅老太住酒店住得舒服，食得行得，但就唔會搬入新酒店啦。點解？因為新酒店冇總統套房囉。
告滙豐信託准排快期
咁羅老太幾時返屋企呢？羅旭瑞就話：「佢隨時鍾意想點就點，最緊要佢開心」，又話佢老人家身體非常好，除咗用輪椅代步，亦都行得吓。
羅家二女羅鴻鏇、孻仔羅啟瑞尋日都有到賀，其中羅啟瑞就透露，羅老太告滙豐國際信託（信託人）一案，已獲法官接納迅速審裁（Speedy Trial），正在排期，希望可以早日審訊。佢亦都希望幾位唔支持媽媽入稟嘅兄長們，可以盡快幫媽媽撤換信託人。
余絲韻