周三凌晨我睇住蘋果公司發布佢哋十周年產品的網上直播，一如市場所料，蘋果公司推出了第三代的Apple Watch，仲有iPhone X！
坊間傳聞「無Home鍵」同Face ID等新功能都一一兌現！雖然有人認為：「有幾出奇？其他牌子一早就有啦！」你唔好理，學谷阿莫話齋：「人哋一早有的，依家iPhone都有喇！」這個先至係果粉們最欣慰的地方！
當憧憬變成現實，無論你是多滿意抑或係唔收貨都好，都唔會再有想像空間。於是乎相關概念股的炒作頃刻逆轉，就變得理所當然。不過咁，蘋果概念股實質上應該分兩種：一種就係強者恒強的龍頭，如瑞聲科技（02018），你想佢跌得多都難，後市我預佢於137元就有支持。
好似通達集團（00698）同高偉電子（01415）就唔同喇。通達是為iPhone供應防水部件的供應商，市場都是到今次才了解並重視這兩間公司的關係。奈何股價一直都唔起。就是連九月十二日前都是死氣沉沉，之後就更加唔使講啦！
至於高偉，佢真係完美地演繹咩叫做「好消息出貨」！於發布會翌日，就從周二收報4.58元跌到周四的3.96元，跌逾15%！這隻股我於3.9元時領粉絲入過，雖然5.78元的高位捉唔到，但都趕及於5元同4.9元走得七七八八，依家真係抹一額汗呀！
不過咁，大家又唔使睇死隻高偉的，始終集團於六月份發盈喜這件事乃係千真萬確，基本面的turnaround不怕紅爐火，等下啦。丘鈦（01478）變質啫，佢未變，我預佢於3.6至3.8元左右企定就入得喇！
富昌金融研究部總監 譚朗蔚（作者為註冊持牌人士，持有瑞聲、高偉及丘鈦）