Market Insight：華潤水泥吼位翻兜

去產能效益顯現

水泥股近排轉勇，華潤水泥（01313）發盈喜，產品價格高企，首八個月水泥平均售價287.8元，比舊年升22.1%，預告首三季盈利顯著增長。潤泥昨抽升4.7%收報5.09元，見近三年高位。

睇番往績，因為比較基數低關係，潤泥首季多賺91倍，中期盈利「收窄」，升5.3倍，第三季水泥價無異樣，業績承接上半年繼續大幅改善都是意料之中，個市依然願意舊聞新炒，緣於估值仲未算貴，全年10倍PE左右。今年四月台泥國際（01136）大股東捲土重來再提私有化，果然無死錯人。

在去產能做得七七八八，今次水泥行業好景睇嚟會比以往持久，等潤泥調整完，試番4.7至4.8元之間支持，可以再買過。

有賺錢貨不妨減磅

美股強到無朋友，周三晚華爾街三大指數繼續升，可惜兩萬八點不破的港股，依然拉牛上樹。恒指埋單跌116點報27,777點，20日線支持頂唔住的話，恐怕要返回27,200點附近搵支持。

周四朝中國出咗多個經濟數據，固定資產投資、工業附加值及零售銷售增長統統唔及預期，恒指一早見過27,895點高位後，迅即掉頭往下，最低落到27,699點，20日線27,692點啱啱頂得住。技術角度睇，恒指十年前自金融海嘯爆發前高位三萬二點跌落嚟，至巴閉係一五年港股大時代，中港熱錢助攻下反彈高見28,588點，之後熱錢水退，跌番成萬點落到18,278點。

估唔到兩年多時間過去，都無辦法完全把市場的心魔清除。指數連升八個月後重遊舊地，數數日子，八月期指結算前恒指觸及兩萬八點重要關口，已過咗十三個交易日，大市依然未肯挑戰大時代高位，先橫行消化升幅，抑或等更具分量利好消息入市配合爆邊？點都好，手上賺錢貨不妨酌量減磅，萬一真係突破28,588點，再追上去相信都仲有大把水位。

地產股估值提供緩衝

大摩一份報告指本地樓市升幅喺六月已見頂，最差估計，今年第四季零升幅，明年跌5%。自○七年，地產股股價同樓價的連動關係唔再完全對等，樓市跌係咪要跟住跌？

響今日香港閒閒哋八位數至買到一個比較合理的兩房新樓單位，古勝真係唔識睇，但目前地產股較重估資產價值折讓甚大，加上唔錯的股息率，相信仲係提供到足夠緩衝，抗衡樓價短期未知的波動。昨日新鴻基地產（00016）份業績唔錯，淨租金收入171.4億元，已經比物業銷售溢利多43%，末期息連中期息每股4.1元，息率差不多3厘。

十四鄉項目中期貢獻唔可以睇小，即使當收租股看待，依家個價都係吸引。

古勝