香港證券及期貨從業員工會永遠名譽會長林德明，咪睇佢平日外表嚴肅，原來都幾有文采，仲係填詞高手！
佢做咗證券及期貨從業員工會六年會長，對個會好有感情，近期佢就將許冠英首代表作《蝦妹共你》，改成《工會之歌》，慶祝工會成立六周年。
林德明將《蝦妹共你》嘅歌詞改為「工會共你，真心真意無償地，樂於分享但求付出，此心赤子交託付與你！」聽到都好感動喎，果然有板有眼！
《工會之歌》中間仲有獨白嘅部分，「團結一起勉勵大家，工會變得巴閉係靠你！」勉勵大家團結之餘，仲明冧會員，真係識Do。唔講唔知，原來林德明唔止一隻作品，仲有改其他歌詞，股壇又多一個才子！
余絲韻