絲絲講場：溫兆華睇北極光唔怕厭
領飛資本行政總裁、前招商證券（香港）首席執行官溫兆華（Wilson）退下火線歎世界，上星期同太座去加拿大，探望入行時一齊打拼嘅舊同事，再一行五人去加拿大西北嘅耶洛奈夫（Yellowknife）欣賞北極光，原本以為會睇到厭，點知原來日日唔同，唔怕「審美疲勞」，非常之享受日頭行山、釣魚，夜望北極光嘅生活。
Wilson離開金融界之後，近期主要都係了解其他行業有無商機，希望發展自己生意，亦諗起當年一起「拍住上」舊同事，係佢入行三年嘅時候相識，後來移民咗去加拿大，Wilson於是喺九月就帶埋太座一齊去當地敍舊。
去到加拿大見到老朋友同契仔、契女之後，Wilson同太座就去睇北極光，佢仲形容浪漫程度有如重演愛情故事，恩愛到出晒面，結果睇足三晚北極光。佢話第一晚最精彩，好似彩龍舞空咁，而之後就最多只係睇到第一晚八成咁靚，都已經非常盡興。
余絲韻