絲絲講場：花旗「舊生聚會」猛人雲集
花旗前幾日搞咗個晚宴，專請番「舊生」同埋銀禧職員出席，話對銀行同金融界有貢獻嘅員工嘉許一番，當晚嘅聚會星光熠熠，好似花旗集團前行長陳子政、八達通行政總裁張耀堂等等，花旗集團現任香港及澳門區行長盧韋柏（Weber）都喺晒度。
話說當晚有超過350名現職及前任員工出席，唔少人嘅年資有成二十五年！
前CEO預警AI爭食
不得不提嘅就係，有「紅籌股之父」稱譽嘅梁伯韜，當年引進紅籌國企進入香港股票市場，所以拎到香港區「卓越舊生獎」。花旗人才輩出，唔怪得有銀行界「少林寺」之稱。
銀行界人才多多固然係好，但唔少行業都擔心人工智能（AI）同埋機械人會取代人手。咁啱絲絲呢兩日睇到，花旗集團前CEO潘迪特（Vikram Pandit）話，人工智能同機械化會減少銀行後勤人手需求，仲話嚟緊五年，銀行界會有三成職位被取代。
其實呢個已經唔係新說法，花旗舊年三月都發表過報告，預計喺一五至二五年，AI會取代銀行業30%人手，今次潘迪特只係將個時間軸推前咗啫。
晚宴有咁多現任同Ex-banker出席，有得開心當然要盡情，不過唔知將來呢類Event啲「星」會唔會有埋AI呢可？真係「今天應該很高興，只要願幻想彼此仍在目前」……
余絲韻