Market Insight：騰訊回勇港股可試高

股市受惠維穩因素

睇番恒指走勢圖，其實八月以來造了兩個高位，走勢有啲似今年二、三月的兩個高位，喺四月初恒指一度失守50日線，當大家都以為玩完之際，轉吓頭恒指後抽破頂，並一口氣由24,000點踢到上六月見26,000點先至肯回氣。

若然大戶真係睇準十月中旬十九大前兩地股市「跌不得」，要夾個市上去，會唔會今年港股都有「金九銀十」，踢到上29,000點甚至更高水平？反正呢一刻對後市又未使過分悲觀。

古勝昨日叫持有本地地產股的看官可以在周初減磅食胡鎖定利潤，呢個觀點並未有改變。反而，好高興見到股王騰訊控股（00700）又有番啲起色，股價重上10日及20日線，收報330.8元，升2.8%，成交達78億元。若然騰訊真係再次衝頂，港股呢浪有機會再試一五年大時代高位。

金融股具備接力條件

論板塊，昨日本地地產股呈個別發展，但內房股又有番啲生氣，好似中國恒大（03333）、融創中國（01918）及雅居樂（03383）升幅介乎5至10%不等。

照計，兩地地產股升到咁上吓，嚟緊又可以睇實啲金融股的表現，畢竟房地產佔銀行貸款比重大，房地產板塊氣氛持續改善，銀行資產質素壓力亦有望紓緩，就睇吓嚟緊金融股可唔可以接力向上。

論板塊，昨人氣較旺的仲有新能源汽車及相關配套（如電池製造）股份，事關有消息指工信部正考慮制訂燃油汽車退出時間表，即全面使用新能源車汽車，反映內地對推動新能源汽車產業發展的決心。

龍頭股比亞迪（01211）當堂醒神晒，股價高開見48.7元後，一度抽高至50.65元，收報49.4元，升4.5%，成交逾8.7億元；五龍電動車（00729）升9.8%，收報0.335元；天能動力（00819）、超威動力（00951）及理士國際（00842）升幅介乎3至4%，泰坦能源（02188）升3.8%。

比亞迪有貨唔怕坐

論走勢，其實比亞迪股價由七月下旬高位52元水平，回落至上月底低位45.85元，調整幅度一成有多，只是沒料到會如此藉政策消息高開反彈。雖然昨日成交唔細，但50元關始終有回吐壓力，睇好行業政策中長線繼續坐無妨，但若未持貨，則不妨觀望49元水平承接再作考慮。

發展電動車產業佔優

至於電池股，老實講，做得電動車的車企，無論站在控制成本抑或確保質量，都應該傾向自己做埋電池，正所謂「肥水不流別人田」。所以，古勝認為與其買現成不少只係做電動自行車電池的低端電池股，倒不如留意吓仲有邊啲電動車股擁有生產電池的能力，即擁有生產電動車的一條龍產業鏈，咁喺規模生產吓先至可以食到行業頭啖湯，做明日之升。

理論上，從呢個角度睇，比亞迪確係有先天優勢，可惜唔知係管理定市場策略的問題，始終盈利增長都未穩定。始終，必須要有龍頭企業做得起，板塊先至能夠真正有大茶飯食！

古勝