絲絲講場：內地銀行業吸金力最強

中國企業聯合會與中國企業家協會嘅「中國企業500強」排行榜新鮮出爐，以營業收入計，頭三位係國家電網公司、中國石油化工集團及中國石油天然氣集團。國家電網公司仲係內地唯一營收超過2萬億元人民幣嘅企業，僅次於美國沃爾瑪，係世界第二大企業。

不過，大唔代表最賺錢。前十位最賺錢企業中，頭六位全部畀銀行霸晒（見表），呢6間銀行今年夾埋賺嘅錢，已經佔咗500強總利潤嘅逾36.6%！賺得最勁係中國工商銀行，淨利潤有成2,782億元人民幣。

能源公司蝕到入肉

入得500強企業，全部都賺錢？No啦。今年蝕錢嘅有43間，蝕得最甘頭十位係：鞍鋼、河南能源化工、山東鋼鐵、包頭鋼鐵、京東、金川、雲南冶金、中國五礦、中國平煤神馬能源化工及中興通訊。

總括嚟睇，用內地講法，「國有企業仍然是『脫困』的主要工作對象」，換個角度亦可以話國家嘅煤炭、鋼鐵等重點行業「去產能」成效顯著。

余絲韻