絲絲講場：馬化騰爆黃志祥科網大計

話說馬化騰尋日出席《跑贏智能時代》白皮書發布會，唔好見佢平日好似文文靜靜，佢上台演講亦會講笑，話香港以往一直有個錯覺，話「High Tech揩嘢，Low Tech撈嘢」（即是搞高科技會損手，經營低科技炒賣先賺錢）。不過，佢話近年呢個概念起咗翻天覆地嘅變化，最大嘅上市公司中，科技企業佔咗唔少席位。

講講吓，佢仲大爆話Daryl（信置執董黃永光，即是黃志祥位公子）早前搵佢食飯，向佢請教有關科技嘅嘢，佢再問落去，先知黃志祥同阿仔Daryl講，最近Facebook其中一個始創人移民到新加坡，呢個人嘅身家漲得好快，快要超過佢哋家族嘅當地首富位置！Daryl仲話「我哋喺新加坡做咗六十幾年，點能夠畀一個連名都記唔到嘅小子超過呢？」

吼實以色列科企

然後馬化騰問Daryl「你阿爸依家喺邊？」Daryl話「經已喺以色列搵可投資嘅科企」。馬化騰感嘆Daryl阿爸行動之快，亦慨嘆科企崛起，令好多傳統家族起咗微妙嘅變化咁話。

黃志祥真係去咗以色列搵科企投資？絲絲問咗，信和集團執行董事黃永光表明：「我們積極物色機會及於不同範疇，透過科技革新為業務增值。」

話時話，講到「執輸行頭慘過敗家」，馬化騰大概體會最深。事關一四年時，騰訊傾收購WhatsApp傾到差埋門一腳，點知馬化騰因為要做背部手術，被迫延遲飛去硅谷，就畀Facebook舵手朱克伯格忽然殺出，開價截胡買咗WhatsApp！

余絲韻