絲絲講場：德銀CEO放風 機械人代員工
德意志銀行（Deutsche Bank）CEO克萊恩（John Cryan）一直都熱衷用裁員嚟達到開源節流嘅目的。然而，銀行冇可能永無止境地裁員！殊不知，克萊恩已經想出一個世紀解決方法，可以繼續裁員，又唔怕無人做嘢！
話說最近喺德國法蘭克福一個銀行業活動上，克萊恩就突然放風：「德銀好多員工會畀機械人取代，而最重要嘅係，大家唔好阻止科技進步。」
咁咪即係話，目前德銀剩餘約十萬名員工，可能面臨嚟自機械人嘅威脅，隨時被炒魷都唔奇。講真一句，自二○一五年底以來，德銀已經開始大規模削減成本措施，為了恢復盈利已經犧牲咗數千名員工。
後勤IT恐變重災區
不過，與其說克萊恩鍾意裁員呢種手段，不如話德銀積極利用高科技嚟顛覆傳統銀行業，都有因果關係。但係，大嗱嗱十萬員工，唔通炒晒咩？呢方面克萊恩只透露受到影響嘅員工會係一個大數目。業界就估計，後勤和IT部門會係重災區。
余絲韻