期指結算過後，遇正中國移動（00941）除息，衝上兩萬八點的恒指轉頭縮番落嚟。不過，撇開內銀與中移，個市氣氛唔算差，抖完氣之後唔排除個市可再下一城。
唔經唔覺，恒指已經連續升咗八個月，近日港股成交即使偶有過千億水平，但對比○七年海嘯前，或者一五年大時代去到二千多億的好日子比較，唔難感受到缸邊仲有唔少投資者對今年升浪依然抱懷疑態度，遲遲未肯真金白銀入市。
此外，從資金依然集中個別指數權重股，二三線股落鑊的個案少之又少，可以斷言目前港股與大牛市的全民股瘋日子，還有一段距離。
成日話吊頸都要抖吓氣，股王騰訊（00700）績後衝上341元歷史新高被沽壓推番轉頭，重磅的內銀亦有相似情況，相信下一輪升浪，資金會開始分散到其他藍籌甚至二、三線股身上。
八月中發盈喜之後，古勝愛股網龍（00777）升到唔識停，上半年股價牛皮，今次一鋪返本。網龍上半年賺2,578萬元人仔，以第一季仲蝕緊近4,600萬元人仔嚟睇，盈虧拐點終於在第二季出現！條數對市值143億元的網龍唔算大，勝在係蝕咗兩年之後第一份賺錢成績表，昨股價再升10.7%收報28.8元。
上半年，公司遊戲業務及網上教育的收入分別錄得36.1%及32.5%增長，收購英國教育公司Promethean後，教育項目逐漸踏入正軌，貢獻超越手遊業務，呈四六之比。上半年來自國際教育業務的經營利潤7,860萬元人仔，公司逐步加強中國及新興市場網上教育平台，料會成為未來盈利增長的重要動力來源。
網龍股價28至29.2元乃過去兩年重要阻力，昨日一口氣殺上29.25元，企得穩有條件炒落後，往35至40元的方向推進。
古勝