孖妹S檔案：10種炒股病態你中幾樣？

經歷七個月「暴力升市」後，八月份股市一度見到回調，但孖妹發現唔少魚缸股友唔多妥，有人晚晚發噩夢見到大冧市、有人為炒燶股而同老公嘈交，亦有人一見到跌市就標晒冷汗兼呼吸急促，唔通佢哋已經炒股炒到有病態？一於開File調查一下，拯救廣大股友先！

病態股民心雄最致命

葉：臨床心理學家葉妙妍

彩兒：你一向長揸藍籌股，有為自己做投資，一定好了解股民心理喇。

葉：我有兩個病態炒股個案好深刻。有一位廿幾歲男士，佢係同父母、太太一齊移居香港，佢讀完書冇做過嘢，一直全職炒股，玩法係每日盯實廿幾隻中至小型股，有異動就入市投機，佢聲稱一度賺過幾百萬元，但過咗一段時間，佢開始問屋企人拎錢，先發現佢欠人過百萬元債，因炒股而失控，又同家人有衝突，甚至有情緒病、想自殺，後來協議跟阿爸返工做家族生意，直接由人工抽錢填債，慢慢先搣甩股癮。

專業人士更易中招

葉：另外，又有一個三十歲嘅男人，由太太帶嚟求助，因為太太已經想離婚，事緣個男人十幾年前開始炒股，但因為做地盤工嘅佢工作辛苦，完咗合約再搵工又畀判頭壓價，所以就全職炒股，輸晒全部積蓄，佢太太係做文職嘅，覺得佢唔應該投機同不勞而獲，畀咗子女一個壞榜樣。

Kitty：唔通呢類炒到病態嘅人等錢使？

葉：呢類人一般係早期炒嘅時候就獲利，然後賺得多就心雄，愈炒愈大，佢哋會有賭徒心態，自信炒股叻，覺得自己做足功課，可能讀過投資課程，留意股市動向，講股有專家口脗，仲會信自己好有運氣，太高估個人掌控力量，其實當中不乏專業人士例如醫生、律師同會計師，佢哋工作時間有彈性，深信有自控能力。

葉：有啲人鍾意刺激，普通炒股已滿足唔到，所以要玩輪證，亦有一朝發達塞住家人把口嘅諗法。有啲全職炒股賺生活費嘅人初初好理智，但為跑數賺生活費，蝕錢蝕得耐，就愈來愈大壓力，炒法愈來愈進取，甚至失去自我。

散戶玩衍品愈輸愈多

唐：致富證券觀塘分行助理經理唐煒鵬（Tony）

Kitty：今年個市勁異常，連升七個月，八月才一度調整，我有啲淡友Friends挾到眼紅紅唔多妥！

唐：我睇住唔少股友由年頭做淡做到七月份，同步眼白白睇住個市升，佢哋好多都係玩熊證，幾萬蚊、幾萬蚊咁輸，當中有唔少人係突然睇淡個市，先激活番個戶口嚟炒，認真係損失慘重，輸十幾萬元、二十萬元係濕濕碎，師奶就輸晒啲買餸錢，唔敢同家人講。

賭仔心態淪傻勇士

唐：佢哋輸得最甘係三月頭、四月尾同埋七月頭大市強力反彈時做淡，一心想追番之前輸嘅錢，所以被挾到攤攤腰，呢頭認命想反手做好友，點知遇着北韓金仔同美國侵侵嘈交，又挾多鑊，搞到要收手，生性返工回回氣，儲番輸咗嘅銀彈，唔敢再炒住。

佢哋大壓力係在於見住啲大股升，自己唔敢追，銀包唔夠錢，所以一味玩衍生產品，望刀仔鋸大樹，點知搞到愈輸愈多，仲有啲勇士買即將打靶嘅熊仔，點知又未能成功翻身；部分股友欠缺理財知識，一路輸、一路入錢落炒股戶口，點知輸凸咗，佢哋輸在賭仔心態，做咗傻勇士！

彩兒：幾時都話炒股最緊要EQ高。

癲到一個月發七次燒

施：資深炒家施宏毅

Kitty：聽聞你曾沉淪股海，中股毒中到入晒骨，搞到一個月發七次燒！

臨床心理學家葉妙妍表示，病態股民會有賭徒心態，對炒股有自信。（朱晉呈攝）

致富唐煒鵬稱，部分股友一味玩衍生產品，奢望刀仔鋸大樹。

資深炒家施宏毅

警惕唔再感情炒股

施：喺九九年嗰陣，我喺加拿大讀緊大學Year 1，見到朋友炒美國科網股賺錢，我就學都唔返，一味跟風，夜晚做功課睇吓相關新聞、睇吓圖表，咁就衝入市炒科網細價股，當時睇住啲數字搞到好似有幻覺咁，心跳快到似偷嘢咁緊張，因成日「芒」住成個投資組合金額嘅跳動，無論係賺錢同蝕錢都覺得驚，最終搞到差啲第一個Sem就畀人踢出校，輸晒中學幫人補習儲落嘅近十萬蚊港紙，大學畢業仲孭住80萬元債！最癲係，當時完全唔覺自己生活有問題，成段回憶好似一片空白。

施：去到○五年，畢業後教英文儲咗十幾萬，冇還到債，諗住拎去博，喺投資論壇搵股票，走去炒窩輪、期權同埋細價股，每日只係食杯麵同埋即食雞脾，搞到體重狂跌，仲一個月發咗7次燒，但自己唔認輸，堅持「邊度跌低，邊度起番身」，兩日內分兩注買同一隻大市Pull輪，搞到再輸十幾萬，呢件事我極嬲自己，困咗喺房反省四日，其後每一年喺呢一役嘅同一日，我都會Set Alarm警告自己唔好再犯，千祈唔好用感情炒股，亦唔好Overtrade！

彩兒：人總有賭性，妄想可以短期內瘋狂賺錢；亦有時會想同股票談戀愛，你錯過兩次就夠晒數啦。