Market Insight：華晨值得秤高一線

業績期進入尾聲，普羅股民實在難以一己之力消化如雪片飄至的業績通告。汽車股是古勝至愛，也特別花多點時間留意。六月股價先上力的華晨中國（01114），上半年賺23.11億元人仔，按年升28.2%，期內，營業額28.3億元人仔升14.1%，旗下合營項目華晨寶馬，上半年賣出18.5萬輛寶馬汽車，按年增30.1%，在業績發布時，公司特別提高全年銷售目標增長預測，由原來的20%提高至25%，新目標賣38萬輛。

踏入一七年，華晨寶馬車系開始換款，憧憬銷售有明顯改善，成為今年其股價後發先至，累升九成四的催化劑。睇上半年份成績表，一七年符合大行48億至50億元人仔的盈利預測，應該難度不大，20元水平整固後，仲係有往上再炒的條件。

之不過，華晨分拆出來的引擎生產子公司新晨動力（01148），就無咁好彩。一七年華晨寶馬停用N20引擎，相關銷售受到衝擊，結果中期盈利跌四成四，縮到得7,096萬元人仔，華晨股價今年大升，新晨股價卻由去年底深谷之中，喺咁意升高「三格」，上周五報收1.12元。

揀啱行業咪選錯股

新晨動力於一三年以每股2.23元上市，眨吓眼股價無咗一半（華晨升113%！）。睇中期報告，公司業績食粥食飯靠佢，專供寶馬車應用的N20引擎，銷量由一六年中期1.64萬台跌到今年上半年見零，連帶其他N20引擎相關的連桿銷售減少，拖累業績。

新晨動力業績難改善

不妨回帶睇番，新晨上市無耐用4.51億元人仔收購華晨瀋陽廠房開發N20。事隔幾年，汽車技術日新月異，寶馬唔用N20唔出奇，翻本未大家心裏有數。舊年九月N20停用前夕，新晨再攞9,477萬元人仔出嚟，向華晨寶馬收購N20引擎的裝配線、輔助設施及備件項目。

可能在下諗多咗，生產線要需時多久調整至其他引擎款式，交易作價又是否合理，實在答唔到大家。但數字唔識講大話，華晨、新晨兩間齊齊飲寶馬奶水大的公司，一間快高長大，一間行三步退兩步，近幾年發展有天壤之別，揀啱行業但揀錯股票真係死得人。

大市似整固完再升

上周港股破頂，恒指周五大升329點收報27,848點，即市高位27,878點，將今浪高位推高兩點咁大把！指數慢火煎魚往上走，睇成交又唔多似虛火咁簡單，上周四過千億成交後，周五主板再交出1,152億元交投，大戶於現貨市場買賣更趨活躍的已相當明顯。

落後藍籌齊發力

大成交資金炒落後，輪到開賭的港交所（00388）發威，上周五升3%收214元，中海油（00883）由虧轉盈，股價升2.74%，中石油（00857）業績由地獄折返人間，勁升22倍，股價升3.7%，藍籌中升幅最大為中國人壽（02628），升4.1%，與幾隻藍籌內銀成為周五的升市火車頭。

技術上，恒指見八月初見27,876點後，大市玩迴力球一樣，插落26,863點來來回回，只要指數收市企穩27,876點樓上，高位三角形整固期可以說是告一段落，將進入新一輪升浪。睇嚟本周三結算前後，好友把握機會進一步誅殺淡友的可能性相當大。

古勝