Market Insight：信義光能候低收集

早排隻信義光能（00968）出業績，半年賺12.55億元，按年升12.4%，股價一口氣由2.2元炒到上2.7元，抖咗氣半個月，昨日逆市跌四格收報2.57元。家陣預期市盈率7倍唔夠，兼有分拆故事跟尾，如果股價縮番落2.5元附近，大家可以開始收吓貨。

信義光能生產及銷售太陽能玻璃產品，主要是應用於太陽能發電場的浮化玻璃，以及相關工程及建設服務。中國政府致力推動可再生能源發展，且近年房地產興盛帶動，浮化玻璃市場整體產能尚未趕上需求，預期公司毛利率未來一至兩年會逐步改善，有助推動盈利增長。

今年四月信義光能以每股2.24元供股，十供一集資不少於15億元，主要用作興建地面太陽能發電場及擴充產能，為未來分拆電站業務上市鋪路。基於估值超平且有分拆潛力，不妨等回吐買番些少。

石油股依然大落後

昨日收市後「兩桶油」齊齊出業績，中石油（00857）半年賺126.7億元人仔，大幅增長22.8倍，拜舊年盈利基數極低，以及國際油價回升勘探業務虧轉盈；中海油（00883）半年同樣扭虧為盈，賺162.5億元人仔。當中中石油繼續派特別息，有3.809分，連埋中期息合計6.926分。

美圖似有春江鴨

面對油價近半年有波幅無升幅，油股今年大弱勢落後大市幾條街，對捧場客而言，特別息不過係安慰獎。油股後市關鍵，要睇油價能否突破過去大半年50至53美元的多頂阻力。

美圖公司（01357）亦派半年成績表，虧損1.3億元人仔，主要係互聯網服務收入大增，帶動整體收入升2.72倍所致。美圖過去三年累積勁蝕過百億人仔，捧場客認為科網企業蝕頭賺尾是常態，不過，平心而論，更多人懷疑是否可以搵到賺錢方程式，蝕少咗可唔可以成為炒作理據？睇近幾日股價去到12.5元水平相當硬淨，有春江水暖鴨先知之兆，即日鮮炒友今日或者可以留意吓。

炒衍生工具 兩手準備

隔晚美股回吐，惟阿里巴巴無視跌市八連升，股王騰訊（00700）都唔失禮，裂口開333元，可惜升幅愈玩愈縮。果然業績後高位341元阻力確唔細，睇嚟整固過後先有機會再上。

升市便由內銀股接力，工商銀行（01398）昨日升2.4%，建設銀行（00939）升1.8%，雙雙創52周高位。八月初恒指升上27,876點後，殺番成千點落到26,863點，chok上chok落，定力唔夠的，唔少被左一巴右一巴。

技術走勢上，如果下周結算前後能趁大成交再破頂，後市應該大把世界。玩開衍生工具的股友，忍手等破位先追勢，應該仲有相當水位。當然要做好兩手準備，如破頂不成縮番落嚟，九月中上旬繼續橫行悶局都唔係無可能。

古勝