絲絲講場：新秀麗全力捕捉Lady

行政總裁Ramesh Tainwala話覺得市場一直視新秀麗係男性品牌，結果好多女性顧客都只會買禮物畀另一半時，先會諗到新秀麗。其實女性先係家庭嘅購物主導者，所以新秀麗打算推出多啲符合女性需求與品味嘅產品，實行通殺！

點符合女性需求？佢話，發現到部分女士花好多錢去美甲，但係新秀麗以往嘅產品就無考慮呢點，設計上好易整花指甲，間接失卻咗呢班客人。依家公司唔止請多咗女高管，仲聘請咗唔少女設計師，希望由佢哋第一身角度出發，了解女性消費者嘅口味同要求。

改造分店 增設Wifi

嚟緊佢哋打算將分店改造，加入座位區同Wifi網絡，畀各位女士放低伴侶專心購物。Tainwala指，呢個計劃喺巴西、墨西哥同意大利都試行咗，反應唔錯，下半年會趁節日假期再繼續試水溫添！

余絲韻