絲絲講場：翁世權催生「新孖B」打風照開工

周三打風，唔少人唔使返工，但瑞萬通博香港上市產品銷售部主管翁世權（Simon）就忙到打風都要喺屋企工作，連囝囝喺北京冰球比賽，呢位出名廿四孝Daddy都只去得兩日打氣，無機會睇決賽！點解忙成咁？原來佢有兩個「新BB」下周出世！

講嘅係Simon籌備嘅首兩隻「瑞通輪」將下周二面世！依家市場上有窩輪嘅發行商有12間，雖然渣打喺一五年時宣布會撤出股票衍生產品業務，但亦有新發行商加入，好似瑞資公司瑞萬通博就正式進入香港輪證市場，隨時掀起新一輪市場競爭。

Simon話，佢哋首批窩輪會先專注藍籌股份輪，率先上市嘅分別係騰訊控股（00700）及中國平安（02318）相關認購證，行使價分別係378.8元同70.88元，取其成交暢旺同走勢強勁。其他如滙豐控股（00005）、香港交易所（00388）、內銀股相關窩輪，以及恒指牛熊證，該行都計劃陸續推出。

近排Simon忙住籌備出輪，返工返到凸，但咁啱囝囝Trevor喺北京參加冰球比賽，做Daddy嘅自然想親身入場打氣，於是Simon上周末及周日已來回咗北京一趟，隨即周一繼續開工。

雖然唔夠時間睇決賽，但見到初賽時Trevor喺場上嘅拚搏表現，相信Simon已經感到非常高興同自豪。其實見到爸爸工作咁拚搏，囝囝肯定亦一樣以Daddy為榮！

余絲韻

絲絲講場：翁世權催生「新孖B」 打風照開工