於上周四、五的一片驚濤駭浪後，我持有的「大寶」騰訊（00700）、「二寶」舜宇光學（02382）同「四寶」丘鈦（01478）終於可以收割喇！真係一額汗！
接下來就等我逐隻講，首先是大寶。集團上半年業績真可以話是地表最強！原以為純利按年升三成幾、四成已經誇啦啦，最終竟然升六成幾！其中手遊業務收入經歷官媒洗禮之後依然大放異彩。不過，股價於341元的高位似乎無以為繼，最後連330.2元的前收市頂都企唔穩，走勢真係大打折扣，不枉我一開市就走Call。
二寶仲陰功，天無眼呀！恒指公司竟然選了萬洲國際（00288）唔選舜宇，分明同市場有仇，棄科技而要老經濟，真令人費解。
不過唔緊要，即使名落孫山，跌幅都唔會大，始終集團是有業績支持的股份，不是純炒憧憬的妖股。好多人等了成晚，打算於100蚊邊的水平吸貨呢，實在是太妙想天開喇！
至於四寶，它簡直是一個傳奇，亦造就了好多人於八個交易日之內大賺逾七成的神話。今浪我大概於兩個星期前已經開始部署，望就是望恒指公司於周三檢討小型股指數時加入了丘鈦，然後再自動躋身港股通的標的。結果，成件事完全係跟足我的劇本而行，連個股價都係，我於周二減少少，周四減多多，完美地吃足整浪！
我強調，我對以上的三寶依然有百分百信心，值得長線持有。只是再細水長流的愛都會有片刻的激情，目前就正是處於激情過後，我要抽身離去了，餘下少少的貨底會同佢度人世的。好業績又發了，互聯又互通了，短期內，我都好難再對它們有任何遐想。因此大家都唔使望住喇，不如專注去耕耘下隻美圖公司（01357）好過啦！
富昌金融研究部總監 譚朗蔚（作者為註冊持牌人士，持有騰訊、舜宇、丘鈦及美圖）