Market Insight：內地航空股有機爆上

資金輪流炒，今浪完全無跟市升的三隻中資航空股逆市做好。中國國航（00753）昨升1.8%，東方航空（00670）升1.6%，南方航空（01055）升1.1%。

美國同北韓局勢緩和，令亞洲地緣政治風險稍降之外，更重要係國際油價彈到上50美元之後，過去幾日又再隊過，隔晚紐約期油落番去46.7美元一桶。去年油組協議減產，到今年把協議延長後，都無助油價一浪低於一浪，高位愈縮愈低，55、53.7、52及50.4美元咁浸浸落的弱勢。

另一重點，係今年人仔並不像預期中弱勢，對透過借美元買飛機，賺人仔票務收入的內地航空股，匯兌影響上有喘息空間，連航運股都因為一個飄忽難測的波羅的海指數反彈而炒得起，中短期基本因素利好的中資航空股，唔排除都有炒落後的可能，如果成交持續對辦，要望到實。

科網股不妨換貨短炒

個市高開低收，近排跟市彈得唔少的內銀股，都見大戶浸貨食胡手影，結果幫圖表派炮製相當肉酸的大陰燭，短期指數一日唔升破27,876點，惟有暫時當住上落市咁玩。

染藍的萬洲國際（00288），因個市唔就，早市見過8.45元，以8.2元收市，升得2.7%。更意外是舜宇光學（02382），僅跌2.7%收報107.2元，仲未返回周三炒染藍的起步位104.7元，反映班中資基金同炒家的手瓜確係硬淨。不過，蘋果公司新一代iPhone發布會進入倒數階段，炒消息、賭染藍，甚至估值上考慮，都維持有貨者要開始減一減磅的建議。

高追網龍似欠值博率

騰訊高位頂到實，反而其他科網股見禾雀亂飛。講到鑊氣，中期虧轉盈的愛股網龍（00777）真係十年唔發市，一發當三年，本來今年股價就未威過，三月見高位26.05元後，市升佢唔升，到七月碌過落19.7元，昨日一挾就升9.5%，收報22.85元，收市價計創近五個月高位，可惜咁大個裂口留喺度，無貨高追似乎唔多值，不妨等等再算。

金蝶營造雙底回升

近排A股熱炒AI同雲技術概念股，要留意內地莊家會唔落嚟雙邊投注。香港選擇唔多，代表之一金蝶國際（00268）昨派成績表，雲端業務仲未有錢賺就預咗，半年盈利跌21%賺1.06億元人仔，但期內雲服務收入增長45%，較整體16%增長高一截，未來似要代替管理軟件，成為推動業績增長亮點。

研發AI啱芬佬胃口

金蝶雲服務客戶過去一年勁增八成，但上客數字增長快，也令成本上漲升得同樣快，上半年蝕咗5,000萬元人仔，估計全年蝕1億元人仔左右。

現今資訊科技行業，賺頭蝕尾，先儲客坐擁客戶基礎，再逐漸達到商業利潤已經係公開的秘密，金蝶的雲服務可能要蝕多兩年，但管理層啱啱放風話引入AI研發，似乎係要迎合班中資基金胃口。金蝶昨日受業績影響，股價插落3.05元守住，之後跌幅收窄，與上周低位睇齊似要營造雙底，守住呢個位，博短期輪到佢發威，輸面有限，值得一試。

古勝