絲絲講場：黑天鵝Out咗？建行行長：提防「灰犀牛」！
乜金融市場咁多動物？！「黑天鵝」大家講得多，即是指嗰啲極罕見、幾乎估唔到會發生，但一出就大大鑊嘅事。最近又多一種動物「灰犀牛」喺內地金融界爆紅，連中國建設銀行（00939）行長王祖繼都話「既要防範『黑天鵝』，更要防範『灰犀牛』」！到底「灰犀牛」係乜？
比喻衝埋嚟嘅大鑊嘢
美國學者Michele Wucker一三年喺瑞士達沃斯世界經濟論壇上首次「拖」呢隻「灰犀牛」出場。「灰犀牛」係比喻嗰啲係人都見到衝緊埋嚟、但個個咩都唔做唔知驚嘅大鑊嘢。
上月中官媒頭版評論員文章就抬隻「灰犀牛」出嚟講防範金融風險，隻犀牛即刻就喺內地紅咗！
其實「經濟動物園」真係愈來愈多成員，天鵝都已經幾隻唔同顏色，美國總統特朗普上場後，有人提醒小心「喪普」發癲會出現「橙天鵝」，橙色係講緊佢頭頂嗰執毛！
歷史上仲有唔少動物形容金融市場，歷久不衰嘅「牛、熊」市外，歐債危機時仲有「歐豬五國」（PIIGS，即葡萄牙、意大利、愛爾蘭、希臘、西班牙）。
余絲韻