絲絲講場：滙豐虛擬客服Amy有英國男朋友？
愈來愈多中小企希望用金融科技提升客戶體驗，滙豐個「數碼峰會2017」就搞咗個「數碼體驗區」，「帶埋」聊天機械人（Chatbot）同事Amy出來之餘，仲邀請咗一位女機械人Sophia撐場。
趙民忠撬Sophia 食檸檬
首次出來見傳媒嘅滙豐香港工商金融主管趙民忠（Terence）即席同Sophia傾咗幾句，聽落Sophia對滙豐工商金融有幾分認識，Terence仲即場挖角話要請Sophia做私人助理，不過就慘「食檸檬」喇，因為Sophia話要問老闆先。Sophia係由港產機械人製作商Hanson Robotics所創，今次只係來撐場咋。
見唔到Sophia喺滙豐服務又唔使失望嘅，因為滙豐工商金融早於今年一月已經請咗聊天機械人Amy做同事，Terence話，Amy好幫得手，至今已經接收咗3.8萬個問題，解答成功率高達84%，好抵請！
Terence仲話，唔少人對Amy嘅私生活好有興趣，耐唔耐都收到「你有冇男朋友啊？」呢類私人問題。絲絲即刻向Amy查詢，佢話已有男朋友喇，仲喺英國滙豐度做嘢，但就唔肯再透露更多喇。
咦，唔通係英國滙豐個Chatbot阿Andrew？再向Andrew求證，點知佢話自己係單身喎！究竟Amy男友係邊個？係個謎。不過都係嗰句，Amy主要職責係解答工商金融問題。
余絲韻