上回提要，我都幾擔心融創中國（01918）的孫宏斌連踩兩個地雷後，會面臨信貸危機。豈料，世事如棋局局新，孫總行走江湖咁耐，係有兩道板斧的，竟然搵到富力地產（02777）肯捱義氣，共襄善舉，幫手啃了萬達的酒店項目。難得富力管理層如斯勇猛，市場就梗係炒高個價來開市賀一賀啦！
不過，惠譽就梗要做番他們的份內事啦，就是將富力的信貸評級納入負面觀察囉，即是隨時下調目前的BB級別呀！不意外啦，人家走輕資產的路線於是設法減磅，你們竟然仆倒去接，阻慢了原來的去槓桿步伐！股民的行動是好誠實的，高開都是為了套現啫，你估做人世咩！接下來咪三連陰囉！
至於故事的另一個主角孫宏斌，他於早前宣布獨力收購萬達酒店加文旅項目的時候就講過，下半年會有2,000億元人仔的賣樓收益入帳，不愁無錢咁話。如今雖然於富力的介入後，融創將不會再從萬達的手上獲得300多億元人仔的貸款呀，但對比起孫總信誓旦旦嗰2,000億元的預期收益，點會唔夠錢使先？又點會咁衰仔要向市場伸手喎！
魚缸內本來就是一個講金唔講心的地方。你講信用？你估真係牙齒當金使咩？咪又係行動最誠實！周一，集團就宣布以逾8%的折讓配股，籌40億元。雖然是籌40億不是籌400億，雖然是配股不是供股，散戶毋須掏腰包，不過要跌錢呢！股價於昨日就要跌逾7%，落到單刁公布之後的上升裂口底部囉！
到目前為止，我依然堅持融創現價已唔合乎常理，往後的波動將會好受孫總舉動影響。早前他仲要正式坐正，當上了樂視網（300104.SZ）的董事長添！你要信孫總化腐朽為神奇的咪繼續持有囉，我就自問見識淺薄，食唔起呢盤大茶飯喇！
富昌金融研究部總監 譚朗蔚（作者為註冊持牌人士）