絲絲講場：滙控歐智華臨別有乜贈言？
滙豐控股（00005）高層換班嘅動作市場極之關注，話說CEO歐智華出年就會離任，呢排滙控正密鑼緊鼓物色繼任人選，歐智華離開之前更大送臨別贈言，佢話任內工作的確艱巨，但無悔接受呢份工，雖則就快離任唔多唔少會感到傷感，但係亦引以為傲咁話。
接班人傳破例搵外援
歐智華出年就退休，究竟繼任人會係邊個，暫時都依然係一個謎。不過呢一排出現咗好多疑似繼任人選，有傳甚或會破例喺出面機構請CEO，如果真係咁，就會打破超過一百五十年由內部擢升嘅傳統。
疑似候選佳麗有邊幾位？前排有傳滙控與美國國際集團（AIG）前行政總裁漢考克（Peter Hancock）接觸過，仲聞說今年初漢考克已經辭去AIG CEO一職，不過有投資者批評佢任內AIG盈利表現達唔到標。
Well，之後無耐又傳出，喺高盛任職咗十六年，去年初先加入滙控擔任全球銀行聯席主管嘅Matthew Westerman，會係滙控下一任CEO最新熱門人選。
其實除咗出面搵人，滙控內部都有幾位唔錯嘅接班人選。比較熱門嘅有常務總監兼零售銀行及財富管理行政總裁范寧（John Flint），仲有環球銀行及資本市場（GBM）行政總裁安思明（Samir Assaf），同埋歐洲行政總裁司馬安（Antonio Simoes），佢哋三位都喺滙控任職七年或以上。究竟最終邊位可以坐上CEO寶座呢可？
余絲韻