絲絲講場：領展幫導盲犬BB改名
香港嘅導盲犬開始開枝散葉嘞。話說領展（00823）有份資助嘅香港導盲犬服務中心，有狗媽媽早前生咗六隻可愛狗BB，呢啲狗BB慢慢長大，有啲要逐漸移交到寄養家庭照顧。
其中兩隻最近就獲領展命名，純黑毛嗰隻狗囝囝就叫Cozy（寫意咁解），金棕黃色毛嗰隻狗囡囡就叫Comfy（舒服咁解）。其實導盲犬BB命名計劃嘅目的，係讓市民或機構有機會直接參與導盲犬發展，持續關注所命名犬隻嘅成長以至投入服務嘅過程。
希望Cozy同Comfy都好似佢哋個名咁，舒舒服服咁成長，能為視障人士提供舒適安全嘅導盲服務。
余絲韻