絲絲講場：7項理財懶醒蠢事

1.【提早拎強積金 / 保險紅利】

香港強積金規定年滿65歲先可提取，你仲想扭盡方法提早拎番？除非你有其他更好退休儲蓄計劃，否則勿輕舉妄動，以免臨老閉翳！同一道理，有買投資相連壽險嘅，亦唔好提早取紅利。

2.【借錢交學費】

理論上，有高學歷將來人工高啲，不過借錢讀書始終唔係最明智，不妨先發掘吓獎學金及助學金之類，以免一畢業就惹來周身債。

3.【唔開信用卡】

擁有信用卡唔代表你要碌爆佢，而係當有真正需要時，例如分期付款等情況下可以用。再者，適當使用信用卡可以儲分、儲回贈，達到慳錢效果。信用卡，一張就夠，唔使多。

4.【廿零歲投資太保守】

有投資總好過完全唔入市，年輕就是本錢，就算押錯注，你仍有時間去修正及改變。

5.【靠專人投資】

「基金之神」博格爾（領航基金創辦人）話，買「被動指數基金」就唔使靠專人，可以降低投資個股風險。邊啲？盈富基金（02800）咪係囉。

6.【儲錢唔睇利息】

活期儲蓄依家幾乎「零息」。理財顧問建議，預留半年固定支出，鎖定為「緊急備用金」後，餘錢應放於高息戶口。想穩陣嘅，就將閒錢做定期存款，利息較活期高，萬勿長揸100%現金。

7.【視買樓為投資】

連買樓都係「理財蠢事」？問題在於係自住定投資。買樓自住，層樓只係實用品，唔等如投資，未必可致富，除非買另一層收租，咁先係投資。

余絲韻