絲絲講場：機械人搶銀行飯碗

平過請人 中勤影響大

事關用自動化智能科技平過請人來做。最受影響會係投行內嘅Middle Office（中勤部門），即是做評估風險、監察流程嗰類。

至於Front Office（前台，即是做交易，直接對住客）？絲絲記得高盛前總裁科恩講過，科技幫高盛喺十年減咗超過一半證券部人手，呢句經已係六年前，依家你話呢？

識招呼報價好使好用

何止投行，就連零售銀行亦已被機械人「入侵」。遠至中國郵政儲蓄銀行喺山西太原嘅財富管理中心，啱啱都「請」咗個智能機械人，識端茶倒水招呼大媽；瀘州市商業銀行亦有個「瀘瀘」，曉分帶四川口音嘅普通話；交行遼寧分行兩年前有個「嬌嬌」做大堂經理！

香港都唔例外！建行（00939）早有機械人客服，識讚客人係「美女」；中國銀行（香港）（02388）就有個RoBOC做分行大使，識報股價同存款利率。

陪客傾偈、斟茶遞水、搞笑賣萌，你更拿手？不過呢啲機械人仲可以當場唱歌、跳舞兼唸古詩喎，你得唔得先！

余絲韻