Market Insight：內險內銀再現大時代

內地上半年GDP增長6.9%，居民收入增長7.3%。整體而言，上半年內地通脹受控、失業率低企、工業增加值增長、樓市投資增速跌但仍錄得增長，經濟確係比外界預期的好，但數據係咪有水分就見仁見智了，反正經濟增長喺政策目標範圍內，班老外都奈佢唔何。

內地全國金融工作會議召開，重點強調要確保金融安全、金融服務實體、金融監管協調、金融風險防範以及金融改革深化。總之就係要多方面防範金融風險，確保由虛入實，監管繼續從嚴。咁的環境之下，A股只有繼續單字一個「穩」，起動之期就要睇上大人幾時發號施令。

既然A股被點穴，要炒就炒H股。上周內險同內銀股起動，內房股昨日亦普遍做好。內險股新華保險（01336）更一度急升逾一成，真係一係唔發市，月初低位至今已累升逾兩成。不過，宜留意圖表顯示48至50元區域阻力非輕，短線若未能一口氣突破，可以考慮先行食一轉，等調整再睇位翻兜。

捧場客耐性夠 揸到返家鄉

講到內銀股，呢期都陸續派息，長期捧場客收息後可能會用利息再增持，反正依家香港樓價咁貴，買樓不如買內銀股，一來估值唔係太貴，二來坐收5厘息左右，放租物業收唔到咁高息唔在講，仲要煩租客問題，一個唔好彩撞着個租霸，勞氣兼傷財。

招行帶頭翻身

唔知看官們有冇留意，有一隻內銀股股價已逐漸逼近一五年A股大時代期間的高位，講緊嘅就係招商銀行（03968）。該股昨股價曾高見24.85元，收報24.8元，已重上一五年六月中旬的水平，與當年高位26.85元相差不到一成，仲未計一五年度及一六年度分別派過末期息每股0.69元及0.74元人民幣，計落即使一五年喺高位接貨，呢一刻都唔使點輸，係咪好神奇！

到底招行係咪打頭陣帶領板塊大翻身，仍要放長雙眼等着瞧。不過，呢個例子亦話到畀大家聽，買中資股一定要揀國家做大當家的，同佢鬥長命總有返家鄉之日。

買中金風險有數計

雖然內地金融監管從嚴，難期望A股短期有咩好表現，但至少即使外圍「地震」，A股有個大鐵底頂住，所以都唔係冇「優點」﹗換個角度睇，A股依家擺明有個政策底，博佢順利過關唔爆煲，站在中長線角度，其實都值得實力投資者分注收集貨源。就如近日高盛所言，隨着A股入摩，A股好可能由「值得擁有」變成「必須擁有」﹗

券商股之中，兩隻龍頭中信證券（06030）及海通證券（06837）都係穩陣之選，次選之列則有HTSC（華泰證券）（06886）及中國銀河（06881）。不過，論獨特，從事投行業務的中金公司（03908）更可取。

中金近四個交易日股價好似食咗大力菜，由11.5元附近起步升到上上周五高位見13.48元，昨日收報12.5元。反正在11至12元水平唔怕買，一五年上市至今低位在9.52元，有位睇，上車風險有數得計。

古勝