上周六跟逾200位粉絲們見面，預測下半年走勢。簡單講：牛市一個，上望是28,500點，即一五年大時代的定位。
要達標，先決條件是升得穿26,155點，這是利用黃金比率那些迷信嘢得出來的。過去有好多人話，恒指上升了六個月要抖抖氣，又有話「Cash is king」之類，叫人保守莫追。係，過去這兩個星期我都無乜點追，主要是由於此前利潤豐厚，由得自己輕鬆吓，等一下。但我多次強調，我未曾做淡過一蚊！
昨日，恒指終於都有番些少起色喇，恒指升近400點，仲有800幾億元成交，個市好似活番。指數猛升，又會惹來一部分人出手做淡，話加息、話縮表，講到好似打到嚟！
我於上周六的活動已經澄清過啦：加息？無人驚的！縮表？買金的人先驚啦！環球包括美國、歐洲、加拿大等央行都要話收水，全球通脹預期低迷，同○九年量化寬鬆（QE）剛剛相反，那時候金價直飆上1,900美金，今時今日直墮至1,100美金都好平常，我唔明點解咁多人仲拎住個弱美元來賭金價大升。
港股牛市的契機是阿爺，阿爺的貨幣上升，阿爺的子民就購買力增，我唔係好認同有人話人民幣升，大媽就唔使落嚟。唔落嚟，留喺內地炒A股？我已經蓄勢待發喇，只要26,100點的大位一企穩就掃，唔怕無晒錢，最怕你無貨。Cash is king？我話係Anything but cash喇！
富昌金融研究部總監 譚朗蔚（作者為註冊持牌人士）