Market Insight：內銀股正蓄勢發力

古勝提到資金流入內險股，昨日繼而又見到交易時段資金流入內銀股。除咗大摩又再發功唱好內銀股之外，老實講，睇好睇淡後市資金都有機會衝入內銀股。點解？睇好後市的話，內銀屬重磅股，要增持係合理推測；睇淡後市，想避險，又有咩好得過阿爺做大當家、估值便宜兼可坐收5厘息的內銀股呢？

交行較弱 建行秤先

在內銀股之中，論勢交通銀行（03328）走勢最弱，相信要等到其餘四大行升到咁上下先至有機會發力追落後。

至於四大行方面，工商銀行（01398）、建設銀行（00939）、中國銀行（03988）同農業銀行（01288）當中，在下較傾向選擇建行，股價回落至6元現承接，此位亦為250日線所在，觸發反彈浪展開，初步阻力位在6.3元，大成交突破的話目標可以上移至6.5元水平。

除咗內險同內銀股，香港交易所（00388）亦係古勝的心水股，上月炒作七一效應，上過205至206元區域之後回吐，基本上守得住在200元關樓上，昨日隨大市反彈，收報202.4元，升2.5元或1.2%，成交9.5億元。

港交所具發揮空間

滬港通、深港通、債券通，A股入摩，講得出的大製作，對港交所都有利，現價往績市盈率42倍，息率2.1厘，香港證券交易所係獨市生意，估值高就梗！以預測市盈率計，一八年度預測市盈率36倍，話貴又唔算係好貴，特別係以現時的大市成交，仲有發揮空間。所以有閒錢的話，建議逢低收集港交所。

汽車股升勢停不了，藍籌吉利汽車（00175）繼續衝頂，昨再創52周新高18.56元，收報18.54元，升7.54%，成交達16.5億元，又係估佢唔到。如果唔信的話，升到更高都唔會買；信的話，順着勢頭繼續安坐順風車，等見廿蚊，有望成今年傑作。

北汽挑戰9元阻力

至於好唔好反手做淡，正所謂「升市莫估頂」，古勝其實同一眾散戶一樣，好少叫人做淡搵食，睇淡寧願揸現金唔做嘢就算，尤其係呢隻股係啲好有米的內地基金坐重貨，除非佢哋散水，否則任佢挾，無謂同佢哋對着幹。

講開汽車股，同一板塊，其實隻北京汽車（01958）相當落後，現價8.14元，近期成交有改善，次季以來底部支持上移，睇吓今季能唔能夠反覆向上挑戰9元關阻力位。

古勝