證監會投資者教育中心最新「家長理財狀況調查」結果，絕對係「其身不正」嘅最佳演繹！喂家長們，睇睇是否講緊你！
調查今年五月進行，訪問咗402位18至49歲並育有12歲或以下子女嘅香港父母。
調查發現，過半（53%）受訪家長根本冇制訂長遠理財規劃，認冇信心夠錢應付仔女教育等開支。憂慮係人之常情，絲絲明嘅。
之但係，憂還憂，竟然有約半數家長每月花費至少3,000元於子女課外活動，當中35%仲係月掟超過5,000元！整體計，子女課外活動每月平均使費係3,306元！咁即係唔諗咁多，使咗先？！
絕大多數（71%）家長同意自己有最大責任教仔女理財，但竟然有41%無付諸實行。咁即係點？！
仲有近半（47%）家長懷孕前冇做財政預算，五個有一個（17%）直言見步行步、生咗至算！絲絲奉勸「其身不正，雖令不從」，鬧仔女碌爆卡前，先睇睇自己。
余絲韻