絲絲講場：鋼琴王子彈出兩層樓！
香港樓價貴到離譜，年輕人上車係咪一定要靠父幹呢？「鋼琴王子」陳雋騫（Phoebus）當年上車，點樣可以收租夠供樓有凸，夠埋佢另外再租樓住？Phoebus尋日就喺一個發展商搞嘅場合上面，分享上車嘅心路歷程。
Phoebus話，啱啱畢業時遇上○三年沙士，市道唔好，佢惟有Freelance教鋼琴儲首期，到28歲（絲絲計番，大概○八年左右）以20萬首期首次置業，買入西營盤第三街舊樓單位，當時月供8,000元。單位原本諗住自住，但撞啱附近香港大學嘅老師肯以兩萬元租佢單位！就係咁，租金已夠佢供樓兼自己另外再租樓。
「唔敢現價入市」
後來Phoebus以900多萬元購入西半山The Babington單位。兩、三年後，已為人父嘅佢賣出單位，再搬到過千呎嘅何文田窩打老道4房單位；而佢亦仲有一層供緊嘅皇后大道西舊樓，目前收租約1萬元。
佢投資經驗咁豐富，依家都話唔太敢入市，因為樓價太高，佢認為政府如果唔改變現行房屋政策，樓市狀況唔會有大改變，睇歷史就知道樓價永遠唔會跌，加上香港地少人多，下一代想置業的確好難。
話時話，「鋼琴王子」點煉成？Phoebus出身音樂世家，阿爸陳鈞潤喺歌劇界無人不識，曾任中英劇團董事局主席。Phoebus本身中大音樂系畢業，但○○年佢讀緊大一時，已自薦到商場彈鋼琴，之後仲喺尖沙咀海港城演奏咗八年，被稱為「鋼琴王子」。
余絲韻