Market Insight：騰訊等埋業績先好諗

數據一出，十年期美國國債孳息上揚，升至2.393厘，由上月中低位2.1厘反彈一成四；美匯指數亦反彈，紐約期金隊落1,209美元一安士收市，穿埋五月低位1,214美元，中期的頭肩頂成型，用間尺一度，往下目標可見1,172美元甚至1,130美元。

港股愈來愈似A股，已是不爭事實。股民入市前都嘗試Cosplay做阿爺肚裏面條蟲，估政策風向轉變，已去到歇斯底里乜都驚一餐地步。新鮮熱辣事件，是上周官媒抨擊騰訊控股（00700）隻新Game《王者榮耀》，仲拖埋港股落水。現今商業世界利益掛帥，以官媒論調，莫非真係有遊戲企業因為社會責任，會專做啲無人理，玩家玩咗一次就剷Game，兼且一定唔會沉迷落去的廢Game先叫有社會良心？

官媒亂轟，股民又受，杯弓蛇影，做多一百步的推演，認定乃阿爺唔撐之兆。古勝認為，大家要咁諗都無計，但今年股王最高位288.4元，往績PE去到57倍。回顧過去歷史，但凡接近60倍PE，股價都自然受地心吸力所影響，短期個勢已轉咗，八月出成績表前股價缺乏催化劑，真係想買的，不妨等抖完暑出埋業績至諗。

調整市恐快殺埋身

上周五晚美股三大指數向好，納指升幅更超過百分之一，但值得注意的是，ADR計價恒指同埋新加坡港股黑期，升幅均十分有限，明顯加息預期再度升溫，對於美國同香港的反應並不一樣。

美國就業市場向好，反映經濟欣欣向榮，相反香港資產泡沫經濟，對於加息步伐加快並不太受歡迎，尤其港匯兌美元近日重返7.8算之上，開始向着弱方兌換保證7.85方向進發，資金流出的情況加快，意味着港息已沒有不跟美元加息的空間。

連升六個月的港股，啱啱跌穿上月的橫行區，有搖搖欲墜之感，萬一個市今日輕微開高後插番轉頭，股民就要小心，《狼來了》故事今次真係要嚟，個市需要一個像樣的調整。

美圖短線博反彈咪貪心

若然要捧政策市場，本周五全國經濟工作會議將會展開，估計今次焦點在一行三會的監管架構上，成立超級協議單位，會議成分會傾向經濟改革多於刺激經濟計劃，不過，五年一次的會議前後，A股表現通常特別好，怕港股回不如短炒吓A股ETF更穩陣。

炒過龍致蟹貨重重

好耐無提美圖公司（01357），由三月高位23.05元反覆落到早兩星期的8.24元低位，近排股價低位見靜極思動，級級向上，借京基集團場外增持4億股的消息，上周五終於吸引到一班魚缸炒家注意，鑊氣鼎盛下狂挾15.7%，見11元的個半月高位。

搵快錢搭順風車，古勝從來都唔會阻人搵食，睇番美圖三月份開始的跌浪，插落嚟之後，四月五日即日出現大成交由14.34元縮返落12.8元，陰燭收市，會係今浪反彈重要蟹貨區所在。要記住，一隻蟹貨重重的股票，同一般炒股方法唔同，炒過龍爆過鑊的股票，博反彈千祈咪貪心。

古勝