個市「吽吽哣哣」兩日，趁期指結算日國家主席訪港，配合摩笛吹奏大笨象滙控（00005）會飛天，個市返回兩萬六點邊。今日基金半年結，似乎高位埋單機會已是高唱入雲。
昨日焦點當然落喺大摩唱好的滙控份報告上，搞到市值成1.48萬億元的巨無霸，可單日急升6.2%，創埋52周高，並貢獻恒指163點。
大摩分析員Anil Agarwal成為咗升市主角，基於昨日夾雜半年結及七一前夕因素，實在唔容易量秤到底幾多功勞歸功於呢位星級分析員。
特登搵番佢往績嚟睇，舊年佢Call滙控表現唔算準，一六年八月初大笨象提出25億美元回購大計，大摩仲咬住個「跑輸大市」投資評級，去到舊年十二月先肯轉軚「增持」。
常言道知錯能改，Anil係就係錯過滙控從49至59元一段升浪，惟自十二月初轉軚報告一出，三日內股價狂升一成，至今都保持「增持」評級不變，追回59至73元呢段升浪，一鋪返晒嚟亦都將功補過。滙控中短期內會唔會見到84元的目標價，古勝唔敢亂估。
港股困守25,500至26,000點之間，悶足大半個月，趁領導人訪港贈興作勢破位。觀乎唔少中資大戶重倉股，好似吉利汽車（00175）掃甩轆上到17.42元歷史新高，無形之手維穩之說不似空穴來風，大家要唔要在高位衝入呢類中資大款愛股，大家宜自行判斷，在下反而想人棄我取，撈番隻康師傅（00322）。
內地食品股三寶，今年康師傅同中國旺旺（00151）走勢強差人意，唯獨統一企業（00220）較為標青，前日股價衝上6.53元，創近十個月新高，主要多得內地今年頭五個月飲品零售市場有13.3%增長的氣氛帶動。相比下，康師傅今年業績較為平淡，飲品及即食麵業務仍處於產品調整周期。首季收入升3.7%，毛利率因原材料成本向上，仍有些少壓力。
不過，業績衰咗幾年，今年好可能見底。其股價由四月初高位10.8元，慢慢落到9元邊有企穩迹象，周一開始股價連升三日，昨日作勢想回，去到10日線9.19元又拗腰上返嚟，9.5元樓下買到，睇嚟輸面有限。最重要係累積淡倉唔少，大家查一查沽空紀錄就知，一旦營運方面有任何喜訊，隨時成為淡友們英雄塚，不妨留意。
古勝