北水頭等倉：中資航空股 買貨唔使急
提早炒作的A股入摩消息，未有對兩地股市氣氛起多大提振作用，呢幾日仲要發生股仔洗倉事件，唔多唔少影響咗市場氣氛，昨日港股跌逾百點，恒指收報25,683點。反正班芬佬上半年都夠晒料交成績表，可以提早去抖抖暑，不排除七月市況會明顯轉靜。
從另一角度睇，港股亦不見得有好大幅的調整會出現，除非本地樓價突然大冧又或者美股崩盤，但呢個可能性暫時見唔到。所以，踏入第三季，筆者認為季初都係炒股不炒市策略，少理指數波動，最緊要揸住的個股升就得。
鞍鋼下站目標6元
油組延長減產協定，但國際油價續於低位徘徊。其實頁岩氣及可燃冰等替代品的出現，長遠對油價的影響正在浮現，市場對油價看得淡，似乎並非無的放矢。三隻中資航空股昨日均隨大市回吐，其中東方航空（00670）股價再次升抵4.8元水平現回吐，建議先觀望4.5元水平承接，企得穩再考慮翻兜。
此外，上周兩個相對落後的板塊包括電力及燃氣股都有異動，相對而言，資源股依然相對落後，昨日果然吸引到資金注視，見到鋼鐵股逆市向上，其中馬鞍山鋼鐵（00323）更以大成交升7%，真係少見。另外，見鞍鋼股份（00347）亦一口氣踢穿100日線5.51元，收報5.59元，短線回吐守穩5.5元樓上的話，下站目標直叩6元大關，回吐主要支持在5.2至5.3元區域。
司慕渢