中國銀行（香港）（02388）最近股價連連創新高，股東應該好滿意至啱。不過，尋日股東大會就出現咗件尷尬嘅小插曲，要勞煩中銀香港副董事長兼總裁岳毅親自調停。
話說中銀香港尋日其中一項決議案，係關於中銀香港與母行中國銀行（03988）關連交易嘅上限，要求獲得股東嘅一般性授權。有小股東唔太明白呢條條款，在席間不下三次衝出去發問，幾個管理層答完都無辦法令佢釋慮。結果搞到另外有小股東唔高興，仲發言話有唔滿意嘅股東大可以賣咗中銀香港股份。你一言我一語，氣氛相當僵。
最後由岳毅出面調停，話多謝股東關心，又承諾股東會後會對有疑問嘅股東再解釋，先至令到一班股東和氣收場咋。
余絲韻