孖妹S檔案：Bitcoin有排癲 炒家絕橋Win

上落波幅大 時刻警惕

M：國際社交投資平台e投睿（eToro）高級分析師 Mati Greenspan

彩兒：你成日都喺社交媒體跟唔同類型嘅投資者傾比特幣經，其實乜人先會玩？

M：乜人都有！市場對比特幣嘅關注正以驚人速度增長，淨係佢嘅價格走勢都足以吸引初學者，以至投資專家，可擺脫由政府同銀行所控制嘅貨幣嘅諗法，令大家都好興奮。不過，大家要好小心，千祈唔好因為價格突發性飆升而被蒙蔽，呢個市場不嬲都係好高風險，價格單日郁啲都可升10%、20%，佢跌都可跌得一樣咁快，高回報意味住高風險。不過，我哋面臨緊貨幣體系更新同完善化，我覺得愈早加入比特幣愈好，但你必須提高警覺，同埋永遠以長期投資為大前提。

虛擬貨幣大事記

e投睿Mati Greenspan稱，可透過CFD和實戰投資比特幣。

細刁易玩 善用錢包

Kitty：我好似好Out添，仲未炒過虛擬貨幣，到底可以點開始呢？花無百日紅，唔通比特幣可以？

M：投資比特幣方法有好多，主要有兩個。若你當佢係投資，唔會無啦啦使咗佢嘅話，可能揸CFD會比較啱你，佢係一種可以用嚟炒波幅嘅合約，可以喺eToro.com開戶，喺你完全了解交易細節前，可用模擬交易玩吓先。若你想實戰，咁就要開番個電子錢包，若係用嚟炒比特幣，個人比較鍾意Blockchain，但開咗錢包就必須買啲比特幣，最緊要係Keep好憑據同私鑰！投資者要注意，比特幣交易係不受管制、唔安全，我建議每次進行小規模交易，買到就要即時儲落電子錢包。

M：佢喺今年嘅升勢，主要歸功於日本四月份將佢合法化，列為正常付款方式，日央行積極推冧日圓匯價，同時，比特幣就係咁升，無論喺科技定投資上，日本家庭明顯面對緊一個好簡單嘅選擇。依家全球比特幣總值少於500億美元，若有1%日本消費轉用比特幣，咁幣值就要大幅上漲去維持呢個水平嘅商業活動，假設係10%、20%嘅升幅。除咗日本，我好留意印度，總理莫迪舊年廢除印度流通貨幣86%的500及1,000盧比面值嘅紙鈔，依家瘋狂咁搵緊替代品，政府正認真考慮採用比特幣，一旦落實，就潛在開放畀13億用戶。

料可取代傳統貨幣

彩兒：有啲人話比特幣可取代黃金，打仗都唔使孭住啲金條走佬，哈哈！

M：啲人鍾意電子貨幣同埋用智能手機支付費用嘅概念，且區塊鏈技術確保到資產最高安全性。不過，我覺得佢唔可以完全取代到黃金嘅避險作用，啲人點都會持有小量實金，以防互聯網出現問題。不過，我相信比特幣同其他加密貨幣最終可取代傳統貨幣。

九成本金買入揸長線

K：虛擬貨幣投資者 KK

Kitty：你年初開始投資虛擬貨幣，咁咪食正升浪？

K：本身炒咗外匯3至4年，今年二、三月一個比特幣嘅價格超越咗一安士黃金，所以吸引咗我注意，去研究虛擬貨幣，研究得愈深入就愈覺得唔單止係投機炒賣嘅產品，而係有長線投資嘅價值，比特幣等係用區塊鏈加密，實行去中心化，同一般嘅Paper Asset（帳面資產）唔同，簡直令我着迷。

刨網站Forum做功課

K：炒外匯時係炒主要匯兌居多，以Swing Trading（短線波段操作）為主，用價格信號捕捉出入市位，會參考一目均衡表機動性去做，分析虛擬貨幣時，我亦會用佢嚟做技術分析，基本分析就會睇市場消息，消息來源喺唔少虛擬貨幣網站同埋討論區都有，如coindesk、Bitcoin Magazine等，資料又快又全面，我每朝都會當報紙咁睇，但比特幣太波動，好多時唔跟基本同技術走勢。

彩兒：身為醫科生嘅你都咁醉心投資，成績有冇你讀書咁叻先！

K：比特幣價格係好波動，但係因自己策略係將九成本金去Buy and Hold虛擬貨幣，只用小量資金短炒，再賺本金吼位買入長揸，現時我投資本金有六位數，約兩至三成放喺比特幣，有六成放喺以太幣（Ethereum），其他就包括達世幣（Dash）等。雖比特幣同以太幣帳面分別賺約1.4倍同4倍，但最初買入比特幣時由1,200美元插咗落800美元，都曾經以為自己分析錯誤。

大戶力撐 走勢料穩升

H：虛擬貨幣投資者兼比特幣礦工 Harvey

彩兒：你中學就識玩比特幣，仲唔係神童？

H：係呀，睇住佢由唔值錢變值錢，後來中國比特幣交易平台BTCC成立，我拎咗超過10萬蚊砌咗幾部礦機，但好後悔，當時用筆錢直接買比特幣，件事就唔同晒，若我冇分段套現，現時賺幅同中幾次金多寶冇分別。

投資者KK持有幾種虛擬貨幣。

投資者Harvey在讀中學時已開始玩比特幣。

投資六位數 賺幾倍

H：我唔係高風險投資者，唔會直接買幣，係因電腦零件值錢，若比特幣熱潮爆破就會歸零。由頭到尾我都冇炒賣比特幣，只試過賣比特幣同埋用佢嚟買其他虛擬貨幣，所以未試過用傳統貨幣買比特幣。我每日都要睇實虛擬貨幣走勢，同埋監察礦機，主要係用BTCC做交易，提款就會存人民幣落阿媽嘅內地戶口，由一開始至今我投入金額係六位數，現時帳面利潤係單位數字倍數升幅。

Kitty：你睇住比特幣「長大」，會「望子成龍」？

H：近年環球貨幣增發嚴重，同時貴金屬價格升幅明顯，加上近年虛擬貨幣抽升，係反映市場對法定貨幣信心動搖，佢曾被大媽炒到見泡沫，但現時係見有穩定大戶資金不斷湧入、有財力雄厚嘅機構加入戰團，見到有穩步上揚嘅走勢。

股樓惡玩 造就山寨幣

蝦：內地虛擬貨幣投資者 我愛蝦蝦（網名）

彩兒：你港股股齡有20年，點解玩起呢類貨幣？

蝦：開頭我以「有泡沫」心態去睇比特幣，後來知以太幣升幅一年有幾十倍、勁過比特幣，就開始研究虛擬貨幣，發現全球虛擬貨幣有幾百種，唔知點入手，香港對於炒比特幣太落後，缺乏相關平台，所以向內地埋手。

年底勢見炒作高潮

蝦：喺內地幾個比較出名嘅炒幣平台入面，我揀咗「聚幣網」，原因係除咗國際虛擬貨幣外，仲有好多內地「山寨幣」可炒，跟住我先去內地中國銀行開戶，佢要求我用內地手機號碼激活戶口，喺成功轉帳炒幣網後，就開始炒幣。我六月頭開戶，首仗揀咗面值細嘅無限幣炒，好快就蝕約7%本金，即忍痛斬纜。其後以0.065元價格買入企鵝幣（現稱企鵝鏈），不足1日升咗一倍，我喺0.145元套現本金，實行零成本投資，直至上周四，企鵝幣已升到0.5元，不足20日賺咗六倍。

本月同期有好多「山寨幣」，如阿希幣、保羅幣等，升咗三至七倍不等，我認為貨幣熱潮剛開始，原因是內地的投資工具好少！A股唔升，樓價升到高位又唔畀投資，唔係太多人有50萬元資產可乘住北水嚟炒港股，今年年底將會係炒作虛擬貨幣嘅高潮。

Kitty、彩兒