Market Insight：航空股乘勢炒番轉

今個星期四為六月期指結算，加埋基金半年結以及回歸廿周年前夕，問十個十個都會估計，股市會有無形之手托住，俚語有話：「眾地勿企」，上半年累積升幅太多的股份，有貨的投資者不妨趁今個星期諗吓減一減磅。

油價低迷或成常態

聯儲局本月加息後，信誓旦旦話會部署縮減資產負債表，意味正式收水的日子快將來臨。不過，從十年期美國國債孳息近三個多月由2.6厘縮返落上周五的2.14厘，反映資金既唔驚長期利率回升，更加唔信聯儲局可大刀闊斧縮表，把資金氾濫的環境逆轉。

油組延長減產協定，但消息有如泥牛入海，上周中紐約期油撻到落42美元邊。有大行唱淡，認為在頁岩油及可燃冰等替代品冒起下，油價在40美元甚至更低水平發展，會是未來長遠常態。

近排三隻中資航空股股價有抖完氣迹象，中國國航（00753）及東航（00670）相對落後，短期油價有迹象想下試40美元，航空股或有機會偷襲炒番轉。

乳業股撈底未係時候

進入六月下旬，成個市同天氣一樣教人納悶，美股死唔斷氣，行三步退兩步，以為A股入摩可以沖喜，點知偷步炒的港股，上周反而連挫四日，跌幅唔大，但卻延續先前的牛皮悶局，睇嚟要過埋半年結先會見真章。

乳業股確係流年不利，蒙牛乳業（02319）旗下現代牧業（01117），上周收市後出盈警，因內地原料奶售價按年跌近一成一，預告半年虧損不會少於5億元人仔，去年同期虧損是5.66億元人仔。若有投資者憧憬去年下半年現牧虧損收窄，睇到蒙牛更進一步增持到61.25%，以為好兆頭的統統要中伏。

其實新西蘭出口原奶價格去年已見底回升，但內地任何有錢賺的生意都係一窩蜂去做，自一○年後，大量原乳牧場投資設立，內地奶價仍低處未算低，部分中小型規模牧場已捱唔住出現倒閉潮，行業何時至否極泰來？始終散戶同蒙牛唔同，得一注本錢無得守，都係等奶價同業績反彈再諗。

美股「特式升市」已危危乎

「侵侵」喺去年選舉期間大聲疾呼話會帶領美國經濟更強大，現就任已五個月，經濟同民生未有建樹，反而四圍惹火頭，顛覆美國長期建立的國際警察形象，走上封關自守之路。

經濟數據漸唔對辦

近期美國經濟確唔及「侵侵」預期，甚至聯儲局認為有條件進一步加息的理想。五月份非農新增就業職位只得13.8萬個，失業率維持十六年低的4.3%。近月通脹有回落迹象，六月製造業及服務業PMI雙雙差過預期。

對聯儲局快刀斬亂麻，喺狂人「侵侵」勝選後短短時間，已三度出手加息，近排華爾街開始有聲音認為過於急進，美國前財長薩默斯亦開腔，認為聯儲局在美國通脹未企穩2%的目標之前，毅然連番加息，可能犯下大錯。

到底誰是誰非，惟有等歷史告訴我們，但債市對經濟及通脹看淡，美股獨自興奮的背馳表現，難免令人擔心，一旦出問題肯定大大鑊。展望踏入第三季，「侵侵」的稅改方案要交上國會審議，再遭遇滑鐵盧的話，固然「特式升市」可以宣布收工，美股要為過去年半，不明不白的升市嘔番幾多出嚟，真係天曉得了！

古勝