Market Insight：汽車股短炒要跟貼

市況波動，科技股又調整，班對沖基金又係例牌將視線轉移至濠賭股同汽車股。

車股吉利汽車（00175）昨日一度創新高15.78元，惟其後亦不敵地心吸力，低收4.1%，報14.84元。流出的資金部分料轉炒長城汽車（02333），昨日股價高開6%見9.66元後，午後升幅擴大，最終以全日高位11.02元收市，升21%，成交逾52億元，呢鋪真係吐氣揚眉。

長汽逆市踩油的其中一個原因，乃獲大行瑞信的祝福，睇好其新推出之高端SUV品牌的營銷，並認為哈弗品牌正處強勁的新產品周期，除新推的SUV H6外，下半年仍有新產品推出，故將其目標價由8元上調至12.5元。老實講，若然昨日唔係咁大成交，睇怕幾難爆上10元樓上。既然能在跌市以大成交破位，順勢而為亦係正路，唔排除好快可以叩12元關。

不過，見到昨日長汽沽空股數增至6,565萬股，呢啲大浪人頭湧湧，除非短期內有更多利好消息支持，否則提防來去也匆匆。

輕裝上路迎聯儲議息

本周英國、美國及日本排隊議息，市場氣氛轉審慎亦在預期之內。利率期貨顯示，聯儲局本周會議加息已是「板上釘釘」，但相信投資者關注的，是聯儲局對緊隨其後的加息進度的的看法，以及聽吓耶倫媽點睇「侵侵」的施政。若然依家個倉唔多貨，輕裝上路，難得自在，預備定花生等睇戲！

騰訊後市有排Chok

恒指季檢上周五收市後生效，騰訊控股（00700）在所佔比重下降之下，上周五早段股價創完新高，收市競價時段卻在恒指基金的被動沽盤下殺跌。適逢當晚美國科技股在高盛唱淡亦顯著下跌，騰訊昨順勢低開，曾見全日低位269.4元，諗住周五股價低收純由指數基金技術操作使然，唔少人藉機作好倉部署，點知十點左右見高位274.8元後又再掉頭向下，真係捉晒入籠！

睇番騰訊幅圖，似去年九月至十月的走勢，古勝長線都係睇好騰訊，但畢竟去年底以來升咗成舊水，高位反覆調整在所難免，呢段時間沾手相關衍生工具風險較高，要量力而為。

創板「三不像」須正視

監管部門正積極針對創業板「啤殼」問題採取行動，成日聽到魚缸「水清則無魚」，反對加強監管。但在下認為，眼見問題愈來愈離譜，監管機構唔做嘢係於理不合、不負責任。事實上，創業板全配售模式將IPO變成私人派對，再唔係就舞高弄低魚肉散戶謀取暴利，問題必須正視，否則長此落去，會敗壞港股名聲。

講到創業板，其實現在都係三不像，一來大部分股份未具「創業」成分，二來亦缺乏新興產業參與，反而見到不少未具上主板條件的酒樓餐飲、建築裝修新股在創業板以全配售形式上市，圍飛炒上，股價根本完全脫離基本因素。

政府成日話要搞兩地互聯互通，偏偏股市一個主板、一個創業板都未搞得好；又成日話要支持創新科技發展，但作為融資平台的創業板卻乏創科企業問津，只淪為「啤殼」工場，真係無話可說。

昨日港交所（00388）行政總裁李小加證實，周五將會就設立新板以及創業板改革進行諮詢，希望真係認認真真做番點實事！

古勝