絲絲講場：想同股神食晏？隨時要2700萬

一年一度與股神巴菲特共進午餐嘅機會又嚟喇！呢個稱得上係「世界上最昂貴的慈善午餐」拍賣，會喺eBay進行，美國時間六月四日（本周日）夜晚十點半開拍，六月九日結束，起拍價係2.5萬美元（約19.5萬港元）。至於慈善午餐活動拍賣所得款項，會用嚟支持三藩市為基地嘅格萊德基金會慈善項目。

最終勝出嘅競拍者可以同巴菲特共進午餐3小時，可以帶埋7位親友去，午餐地點同樣係紐約曼哈頓嘅Smith & Wollensky扒房。巴菲特對傾偈話題不設防，只要你夠膽問，佢就夠膽答。不過股神有個條件，就係絕對唔會透露下一步揀乜投資。

股神就快87歲，巴粉更加珍惜每個同股神近距離接觸嘅機會。巴菲特慈善午餐拍賣價格近年係咁升。舊年，巴菲特慈善午餐據悉由一位女士以345.67萬美元（約2,696.22萬港元）成功投得，出價同一二年歷史最高價一樣。

咁多年拍賣，一一年拍賣贏家係基金經理Ted Weschler，最後仲畀巴菲特請佢喺巴郡做投資經理添。你睇，同股神食飯真係塞錢入你袋！

余絲韻