絲絲講場：港燃慶生 拉埋小股東切蛋糕
今年係港華燃氣（01083）成立十周年，公司尋日舉行股東會，仲預備咗「生日蛋糕」，同小股東分享。股東會完咗之後，管理層齊齊切蛋糕，有小股東問可唔可以埋去影相，主席陳永堅更邀請佢企喺中間，之後仲叫攝記哥哥拎番呢位股東嘅聯絡方法，畀番張相佢。
無計劃派特別息
十周年呢個特別日子，會唔會有特別息派？集團執行董事暨行政總裁黃維義話無呢個計劃，又指十年以來，派息已經增長咗12倍。
其實港華燃氣前身叫百江燃氣，中華煤氣（00003）○七年成為大股東之後先改名，而據聯交所股權披露資料顯示，「四叔」李兆基目前持股為65%。
之前有傳內地發改委會對燃氣價格加強監管，燃氣公司准許收益率以6%為上限，陳永堅話每個項目回報率唔同，平均6%都合理。集團又預期上半年天然氣售氣量可增長17%，全年增長就有15%。
余絲韻