Market Insight：汽車股睇位炒番轉

回顧五月份，除咗騰訊控股（00700）表現突出之外，其實內險股都甚有睇頭，中國平保（02318）股價累升18%；另新華保險（01336）、中國太保（02601）及中國太平（00966）均向好。有內地報道指，養老保險綜合改革方案預計今年內正式公布實施，方案包括對養老保險統籌層次、完善個人帳戶以及延遲退休等重要改革作出制度安排，消息帶動板塊氣氛。論勢，追落後可揀剛破位的中國太保，目標價向35元推進，回吐宜守30元關。

早前古勝都講過，班芬佬一路都係輪流炒作科網股同汽車股，呢期龍頭股騰訊整固，果然又輪到汽車股發圍。吉利汽車（00175）昨日又創52周新高；廣汽集團（02238）及華晨中國（01114）均升逾3%、長城汽車（02333）升逾2%，就連比亞迪（01211）都升逾2%。

如果短期汽車股板塊維持，建議睇埋汽車服務股，如中升控股（00881），股價在11至12元水平整固過後，有機會試破三月高位12.22元，大成交突破下一阻力位在14元關，失守11.2元止蝕。

搞好A股 唔憂冇外資

六月份市場焦點除美國息口去向外，喺香港時間六月二十一日MSCI就公布是否納A股入系列指數亦為焦點。古勝認為，A股再食「檸檬」亦唔係咩壞事，反正若然未符條件就無謂勉強，關鍵係內地金融改革不能停步，只要堅持完善市場機制及監管制度，長線唔憂冇外資吼，畢竟以中國今日的地位，誠如中證監所講，任何沒有A股的國際指數都不完整。

唔知係唔係憧憬A股入摩，昨日A股假後做好，離岸人民幣兌美元漲幅擴大，升穿6.79關口。魚缸有傳聞指最近外資評級公司調低中國主權評級，準備讓人仔空倉收割，點知國家隊出擊護盤，成功擊退人仔空頭，又指十九大前中央都不會容許匯市及股市出亂子。

總而言之，在下依然相信，下一波調整浪幾時嚟冇得估，但嚟之前匯市必有動靜，所以股友睇實股市之餘，亦要睇實人仔匯價表現。

美圖10元樓下有得諗

講開MSCI，昨日收市後轉換成分股，見到MSCI中國指數新貴敏實（00425）升逾半成，而事先張揚食詐胡的美圖公司（01357），因為有新消息，昨日無份入摩但股價照升逾5%，收報9.6元。感覺班大戶坐了美圖重倉，入摩只係遲早問題，股價喺10元樓下又會有班捧場客出手支持。

科通失陷 瑞聲難幸免

醜婦終須見家翁，科通芯城（00400）昨復牌，由頭隊到尾，散場跌兩成三，連6元都守唔住，收報5.98元。無疑近日淡友四出搵食，一來科技股估值高大市一截，最重要係港股日益A股化，上市公司質素一蟹不如一蟹，遇到有心人煽風點火，投資者信心一動搖，管理層就算行得正企得正，要短時間內成功解畫令市場信服的機會，始終近乎零。

炒落容易炒上難，可以預見類似放冷槍事件只會愈來愈多。睇昨日慘況，難免為拉閘已經兩星期的瑞聲（02018）捧場客擔心，復牌唔知又要擺低幾多。

古勝