絲絲講場：後生打工仔 6成使凸晒

31%人孭債 平均欠3.7萬

調查喺今年四月訪問咗500位年齡介乎18至29歲在職年輕人，發現31%受訪年輕人都有債務，平均欠款額達3.7萬元，有7%受訪者的欠款更高達五萬元或以上。當中有88%人持有信用卡，但約五分之一都唔可以每月全數還款，平均信用卡債務達兩萬元。

同時，86%本港在職年輕人都面對個人財務問題，62%受訪者更坦言於過去一年入不敷支，亦有58%話無制訂個人預算。佢哋更加無定期儲蓄習慣，逾六成話只會偶爾儲蓄，另有8%甚至承認完全無儲蓄習慣。

近四成受訪者並未訂立財務目標。年輕受訪者都着眼於滿足短期目標，有45%人會儲蓄準備度假及有20%會購買心頭好，比例遠高於長遠規劃目標，例如為退休作準備就只有18%。

更值得留意係，逾三分之一受訪者話平均每份工僅做一年或更短時間，更有44%受訪者曾「裸辭」。

宜定期儲錢 訂長遠目標

此外，在職年輕人對投資所知甚少。過去一年，有32%冇參與任何投資活動，有投資的則大多傾向短視近利，對投資回報抱有不切實際期望。投資者教育中心總經理李博衛就奉勸年輕人必須立即行動，培養定期儲蓄習慣同制訂長遠理財計劃，呢個係確保未來財務穩健最佳方法。

余絲韻