孖妹S檔案：熟女執靚組合變富婆
呢排女人圈又興番講「女人三十」呢個話題，唔通女人三十真係爛茶渣？呢個話題真係令孖妹近排都失眠，黑眼圈仲大過手袋，搞到行出中環，男士嘅回頭率跌晒，所以搵咗三位30+嘅財圈絲打一齊去Afternoon Tea傾心事，點知佢哋笑到Gap Gap聲，仲話女人三十更要有自信，兼且要謀求私己錢增長大法，向荷包乾硬化Say No，我哋梗係即刻豎起對耳偷師啦。
人買我買 投資大忌
蔡：法興證券上市產品銷售部副總裁 蔡秀虹（Eva）
彩兒：雖然我仲未到三十，但最近上咗套電影《29+1》，齋睇電影預告就已經感受到大限嘅壓力啊！
蔡：我都過咗三十歲好幾年，其實女仔廿歲到三十歲轉變係最大，經歷畢業、搵工做嘢、結婚、生仔等，過咗三十，事業上都會以穩定為主，所以要喺心理上做調節。女仔係好應該有私己錢，除咗儲錢之外，你知啦，女仔係好鍾意濕平，儲落私己，有時想買嘢獎勵吓自己都容易啲啦！
我自己啱啱畢業出嚟做嘢，就即刻買保險先，係人壽嚟，之後就做月供基金，因當時人工唔多，又想自己固定咁每個月儲起一部分，怕冇人逼住會「巴巴」聲使晒啲錢嘛！
高息股及ETF夠穩陣
Kitty：你貴為現役輪后，衍生產品分分鐘都幾倍幾倍上落，個人投資會唔會都咁刺激？
蔡：正因工作關係，我哋呢行投資要申報，所以我唔會短線出出入入，持股會睇中長線，現時資產組合有25%投放喺高息股同交易所買賣基金（ETF）、55%喺物業、20%現金。作為職業女性，投資最緊要唔好急、人買我買，咪聽人講可以贏個名牌袋就亂跟，要了解投資產品嘅風險，喺股價下跌時，唔好胡亂溝貨增加風險，了解自己可承擔風險能力，冇咁大個頭就唔好戴咁大頂帽！
蔡：股票方面，我會比較鍾意穩定派息嘅股份，特別係一線銀行股、公用股，貪風險低啲，冇咁怕停牌會影響股價，最緊要自己個心揸得舒服，我都有揸自己公司隻股票，係歐股嚟，以前有揸過工商銀行（01398）、中國銀行（03988）等內銀股，若滙豐控股（00005）落到60蚊樓下，未來都會吼位再入；ETF方面，因為睇好內地市場發展，我都已經持有恒生H股ETF（02828）、X安碩A50中國ETF（02823）兩至三年，亦貪以上股份流動性高、容易變現。
重視保險 積金進取
陳：東興證券（香港）研究部總監 陳鳳珠（Ellie）
彩兒：你身為專業股評人，成日寫咁多研究報告，炒股實有一手啦！
陳：就係因為我嘅角色問題，會避開投資股票，我只係之前開咗個較高息口嘅出糧戶口儲吓私己，所以好窮，好彩同家人住唔使交租咋！女人必備嘅保障，好似危疾、包含女性疾病保障嘅保單我就一向都有供開。
正因自己冇炒股，加上之前有份工，公司要求僱員無上限地供足5%強積金，所以我覺得強積金好重要！之前特登將多個保留帳戶集中整合，轉咗去宏利，因為自己仲後生，可以享受平均成本法嘅效果，所以唔會揀保本同保守型嘅基金，現時股債比例會係七三比，主要投放喺環球、亞洲股票基金，同埋環球債券去分散風險。
揀女人股 謹記分析
Kitty：我都唔知幾時先搵到我嘅男神，可能要儲定姑婆本，畀啲Support我啦。
陳：有私己係好事，唔好靠晒另一半，女仔揀股好多時會由生活出發，例如成日接觸嘅零售股、金飾股同化妝股，但謹記揀股一定要分析，我諗唔少女仔會着過百麗國際（01880）嘅鞋，但佢其實轉型失敗，買唔過。
喺投資組合上，我建議可以將三成資金放喺房地產投資信託基金（REITs），特別係主力中高檔商場同甲級商廈嘅，股息率有望提升；可以將兩成放喺國際金融股；兩成放喺冇咁多匯兌損失、同店銷售增長持續，主力生活必需品嘅零售股；最後，可以放三成資金喺有雲業務嘅科網股，博未來兩至三年高速增長。
唔好全部蛋放一個籃
趙：前新聞之花、輪后 趙海珠（Alison）
Kitty：雖然你泊得個好碼頭，但會唔會擔心自己升級做靚媽之後競爭力下降先？
趙：現代女性遲婚，三十歲會係一個心理關口，三十之後就唔係妹妹仔，角色上係女人，呢種角色轉變係一種畀自我嘅壓力，三十打後當然要繼續自我增值，不斷吸收新知識同接收新事物，就算我係全職媽咪，都唔係一個師奶，要做一個追上潮流嘅師奶！私己錢係自我保障，理財就更加係終身議題添，我依家冇穩定收入，就更加要將儲開嘅錢增值！
「唔好將全部雞蛋放喺同一個籃」係我嘅投資之道，我會將投資組合四成做儲蓄、三成放喺股份、三成放喺基金，用嚟分散風險。以前我做輪枱嗰時，因較緊貼市場，所以投資取態係較高風險，依家要睇住兩個小朋友，只會喺近中午收市同臨近收市先會睇市，所以現時取態已調低到中至低風險，一定唔會買窩輪！
少睇市 寧揸大藍籌
彩兒：你31歲之前已經完成「成名、跳槽、進修、結婚、生仔」五部曲，咁好命！你究竟揸緊乜心水股，等我跟吓風先！
趙：因為少時間睇市，股票就一定會揀大藍籌，現時主要持有中國平安（02318）、南方A50 ETF（02822）、中國交通建設（01800）、江西銅業股份（00358），大部分股份喺滬港通開通前已買落，特別睇好內險股係因為內地人口老化，睇好壽險業務。我偶然會短炒，近期同經紀朋友傾股經，同埋留意新聞，小注買入咗隻呢排業務上有改變嘅本地電訊股短炒，帳面有獲利。
我覺得投資最緊要以個人風險承受能力同貼市程度去揀產品，唔貼市就一定唔可以掂衍生產品喇，暴跌都唔知咪死火……仲有我投資唔會貪心，每一次都會設止賺、止蝕位，到價就出貨，保持個人嘅投資紀律，控制心理質素。
若有料報畀彩兒同Kitty或有嘢問，可電郵money.biz@on.cc
Kitty、彩兒