Market Insight：內房股蓄勢再發力

四月份內地70個大中城市樓價繼續上揚，調控力度無咁大的三線城市尤其升得厲害，新建住宅單月平均升幅0.7%，靜咗一排的內房股統統發力，中國恒大（03333）升9%，收報9.48元創歷史新高。

地產股無懼新辣招

呢鋪睇怕內房淡友有難，其餘好似碧桂園（02007）再創九年新高、融創（01918）及綠城（03900）各升5.7%及4.9%，反而兩隻內房藍籌走勢較慢熱，華潤置地（01109）及中國海外（00688）分別升1.1%及1.3%。

香港同內地一樣，樓市愈調愈熱，上周五金管局又再推三項逆周期措施，包括收緊銀行對按揭貸款的風險評估要求，下調多於一套物業按揭的成數，收緊收入在外地借款人的貸款條件。

簡單講，係針對已經持有多於一個物業的投資客，以及非本地買家。依靠「成功需父幹」的一批準買家，真係難為了爸爸，幫仔女置業額外要擰多一成首期出嚟，又或者放棄二手市場，幫襯發展商買新樓，貪佢有高於按揭成數上限的發展商二按。一、二手樓差價短期睇嚟有可能會進一步拉闊，對地產股而言，今次辣招長遠未必是壞事。

跟炒騰訊 轉身要夠快

騰訊控股（00700）單天保至尊，喺美股動盪之下，恒指全周仲可以保住有18點進帳，收報25,175點。騰訊季績表現亮麗，刺激股價一周累升10.2元，收報268.4元，計落其市值已經去到2.5萬億元，同舊年香港的整體GDP數字差唔多，認真誇張！

大行最牛睇336元

不過，依家港股市場通街垃圾股，股民同投行大孖沙都唔介意貴買貴炒，齊齊高唱騰訊300元不是夢。高盛率先睇300元目標價，但一山還有一山高，最牛的星展拋出336元目標，維持其「買入」評級。

講真，在納指已經突破二○○○年泡沫水平，龍頭科技股到底值幾多錢？大家各有各講，有人認為50、60甚至70倍PE都唔貴，因為未來會係科技股世界，全球十大市值上市公司，科網已佔去六席，未來會否十席全取無人知。

不過，今年倉底無騰訊要跑贏大市確實唔容易，總之股民要小心，一見轉勢要識得全身而退，要記得炒個勢，千祈咪到時先嚟磨爛蓆。

瑞聲想翻身唔容易

上周瑞聲科技（02018）被狙擊，引發二、三線科技股洗倉潮，對住「股壇蝙蝠俠」，瑞聲的反駁似乎有點力不從心。

無辦法，瑞聲估值高，沽空機構聚眾推牆，打開缺口之後，自然會有更多聞到血腥味的對沖基金跟風，即時一眾大行分析員落力撐場，但淡友未夠皮前一時三刻要逆轉形勢，殊非容易。

網企超高收購價嚇人

不過，網企巨人阿里巴巴旗下的阿里健康（00241），完全無受科技股小股災影響，上周五抽升11.1%收報3.79元。皆因向阿媽收購天貓「藍帽子」保健食品業務的消息有支持。

阿里健康以總代價38億元，將按每股3.2元發行11.88億股，相當於已發行股本的14.49%償付，阿里變相注資增持。

同之前的收購一樣，留意交易細節，實在好難鼓起勇氣合埋眼盲衝入去。清兵們既唔好問點解收購的公司有1,181萬活躍買家，得嗰6,227萬元人仔營業額一年咁奀，更唔好質疑一七年度盈利2,115萬元人仔，相當於158倍PE的收購出價抵唔抵。

古勝