絲絲講場:鷹君羅老太為乜嬲爆? 原來係……

鷹君(00041)羅氏家族爭產疑雲一波接一波,甚至發展到羅老太羅杜莉君同第三子羅嘉瑞要「隔空對質」。究竟何事令羅老太如此動氣?事件源頭係……有人唔聽佢話。

話說,原來羅老太去年落Order要求管理羅氏家族基金嘅滙豐信託執行某啲指示,但滙豐信託冇做到,令羅老太相當不滿,甚至喺去年底索性入稟高院要求撤換滙豐信託。滙豐信託一向負責管理羅氏家族基金,個基金運作咗三十多年,一直相安無事,估唔到今次乍現風波。

有董事行使股份認購權

至於羅老太要求滙豐信託處理啲咩有關家族資產嘅決定?暫不得而知,但可以肯定嘅係,牽涉嘅絕非小數目,亦肯定係重要嘢,否則唔會搞到又打官司又「酒店暫住」又「隔空對質」咁大件事。

另方面,羅嘉瑞前日提及無法與母親聯絡,質疑母親已被隔離;但據羅老太身邊人透露,又話羅老太現時「出入自由」喎。

羅氏家族爆發爭產疑雲以來,鷹君任何股權變動自然成為焦點。香港交易所最新資料顯示,近日有董事行使股份認購權,鷹君因而發行65萬股,發行價介乎26.05至31.45元,涉及金額超過1,887萬元。

又據港交所資料顯示,鷹君羅氏家族長女羅慧端上月行使過認股權,行使價亦同樣介乎26.05至31.45元。咁啱嘅!

余絲韻