Market Insight：內銀內險擇優收集

A股雖仍然受壓，但個別優質股逆市走強，如新華保險（601336.SH）、中國人壽（601628.SH）及中國平安（601318.SH）均高收作結。港股走勢呈突破，持貨不足的指數基金要硬着頭皮入場追番些少貨，重磅的內銀內險股唔多唔少都得益，故見昨日大市成交靚仔番晒，有936億元。

投行瑞信發表的報告將部分內銀股目標價上調，主要係預期未來幾個月內地經濟增長或會放緩，並促使第三季中央再推寬鬆政策，利好內銀股。不過，古勝認為若然Buy呢個概念，依家未免早咗啲。

中銀香港挑戰35元

不過，無論對內銀及內險業的監管收緊，長遠都係好事，而此期間所引發的股價波動，係收集大型優質內銀內險股的良機，只要揀啱股份，自可化危為機。

除咗中資金融股，其實本地及國際金融股的表現都唔輸蝕，友邦保險（01299）再創52周新高，中銀香港（02388）亦成功破頂，由於黃金交叉初現，相信今浪可突破一五年高位33.7元，直叩35元大關。

買強股機會一瞬即逝

港交所（00388）首季純利多賺19.8%至17.16億元，股價昨一度飆到上198元，收報194.2元，倒跌0.1%。理論上，次季至今，港股氣氛比首季好，加埋一如所料嚟緊會公布債券通詳情，照計港交所估值有上調空間，短線叩200元關應無太大難度，是浪目標反覆向二月中旬高位204元進發。

另一隻必講的藍籌一定係騰訊（00700），蘋果公司股價迭創新高，香港亦有騰訊股價再創新高，全日高位見255.4元，惟高位有回吐，收報250.4元，跌0.16%。

睇其股價四月中旬開始每兩個禮拜行十蚊，在下認為揸Call輪可考慮喺周五或之前先食一轉，惟中長線投資則可以少理，繼續穩坐釣魚船。

講到騰訊，其主席馬化騰曾喺去年減持公司股份，減持價大概170至180元左右，依家睇番接佢貨的芬佬贏都開巷。再睇ASM太平洋（00522），上月大股東配售2,000萬股，每股作價105元，套現約21億元，該股昨收報122.3元，再創52周新高，接貨者又唔使一個月經已穩賺近兩成！

所以話，有時啲大晒士股被大股東減持唔一定係壞消息，反而若股價因此而被質低，可以考慮趁機吸納，博坐到上順風車！

醫藥板塊靜靜起動

呢期留意到幾隻優質醫藥股股價持續做好，如石藥集團（01093），唔經唔覺股價已突破11元關，雖然睇往績市盈率已去到32倍，但作為一隻具增長潛力的醫藥股，呢個估值絕對唔過分。

石藥為行業首選

集團剛宣布斥資970萬美元收購美國藥品研發公司，早前又宣布研究分拆石藥集團新諾威於內地上市，前者猶如風險投資，投資金額相對公司市值絕對係一項小投資，但若研發成功可以發大財；至於後者，分拆事宜有助更好地體現公司資產價值，對股價起支持，喺醫藥板塊之中，石藥可視為核心之選。

另一隻有異動的醫藥股係復星醫藥（02196），股價昨升5%收報30.75元，創一五年六月以來新高。股價做好，主要是公司公布周二獲控股股東復星集團分別增持A股及H股。論走勢，復藥短線如能站穩30元樓上可確認突破，季內目標上試34至35元阻力區，主要支持在28至29元水平。

古勝