絲絲講場：絕症男炒Bitcoin搵命博！

美國有網民喺社交網站出Post，話自己患咗絕症，索性博一鋪。佢押咗自己間屋，將捱過○八年金融海嘯後呢10年儲落嘅成副身家32.5萬美元（計落約253萬港元），一鋪買晒Bitcoin，總共買咗191個！「等Bitcoin價上到一萬蚊（美元），我就搬去西岸，遠離我依家住嘅地方嗰啲嬲我嘅人！」

傳人行下月加強規管

絕症男個Post一出，即刻激嬲更多人！網民群起鬧佢蠢，客氣啲嘅就話，簡直有如中學化學老師為人生巨變而竟然走去製「冰」毒咁；有啲直頭話「祝你好運啦，勁白癡！」；有啲就話「咁仲唔係見頂信號？係時候賣晒啲Bitcoin去買樓！」

講到炒Bitcoin夠癲，點少得逢炒必到嘅大媽。內地傳媒呢兩日就有風吹，話人民銀行打算下月推出比特幣嘅規管文件，仲聽講監管當局今年一月就各個比特幣交易平台進行嘅現場檢查已有結果，人行有意近日向OKCoin、火幣網及比特幣中國呢三家比特幣交易平台，發出行政處罰意見告知書添。

不過，你有你加強查管，Bitcoin價佢有佢升，尋日一度高見1,752.92美元。若按內地比特幣交易平台火幣網嘅數據，比特幣身價更升穿1萬元人民幣關口，尋日高見10,136元人仔！

睇住Bitcoin價家陣喺1,700美元水平，絕症男就睇1萬，但望Bitcoin行得快過佢！

余絲韻