內地股市呢期好似食錯藥，陰吓陰吓跌，加上圍繞證券同保險業的執法行動不絕於耳，市場氣氛利淡。好似法國總統選舉結果是好消息，但昨日滬綜指仍跌0.79%，深成指更跌1.9%，就知A股有幾弱！港股則尚能隨外圍向好，恒指升101點收報24,577點。
個股方面，受中保監管理層地震消息拖累，內險股上周現沽壓，其中新華保險（01336）上周五一度低見36.55元，昨日隨升市反彈2.4%，收報38元；中國人壽（02628）及平保（02318）分別升0.6%及0.3%。正正由於受A股氣氛拖累，睇怕短期內險股表現仍受到限制。
不過，若着眼中長期布局，下半年大摩可能宣布納A股入MSCI系列指數，則內險呢類重磅股必然係芬佬之選，AH股互動下，內險H股又唔使睇得太悲觀。從呢個角度睇，次季內險股調整浪，或為下半年的好倉部署提供機會，實力派不妨耐心觀望低位承接，部署入市機會。
內險股中，論業務戰略及經營表現，平保一直係芬佬首選，是浪調整落番40元邊可考慮。此外，國壽質素亦不失色，21元是一個較大支持區，回落至接近相關水平可留意分注作中長線收集機會。
司慕渢