孖妹S檔案：巨企好「盈」 科網股無泡？

2017市況有別千禧年

彩兒：死啦，我買重科網股，若泡沫再出現，我啲姑婆本睇怕都血本無歸，要搵番個金龜婿箍到實。

Kitty：你使乜咁心慌？話唔定我有法子解救呢。

彩兒：你睇吓，依家科網股破頂、納指新高，人人要貨唔要錢，個情況咪似足舊時科網股股災前先兆？最怕就係泡沫爆破，九九年納指升咗85%，○○年升到5,132點高位，三月份開始跌，碌到去○二年低位1,108點，足足跌咗78%，好似跌咗落18層地獄。港股當然狂震，○一至○三年合共跌超過五成，唔少股友輸到喊。

兩代科網股爆升癲況比較

豐盛 馮宏遠

用戶撐場 業績有數計

Kitty：你又唔使咁愁，查實兩次情況至少有三點不同，上次悲劇未必會重演。首先，當年科網股只係掛羊頭賣狗肉，部分股份商業模式根本與科技無關。啲公司一有個網站就叫科網股，只要公司有「e-」字牌頭，或係「.com」掛尾，就有價有市，個個搶住埋單。就算係有實業嘅企業，只要分拆網站出嚟，一樣可上市掠水。

Kitty：睇番目前，依家嘅科企真係有料到，騰訊搞Game搞到風生水起，又有微信龐大用戶支持，瑞聲及舜宇都係做手機硬件，業績有數得計。你放眼海外，蘋果公司、亞馬遜及facebook，個個有實業又賺錢，真係唔講得笑。我阿爸依家都開咗個facebook Account，想偷睇我識咩男仔！

愈賺愈多 業務非虛火

彩兒：佢可能會失望，因為根本就冇！Anyway，除咗依家嘅科企夠堅外，今次個市仲有乜唔同？

Kitty：喺盈利方面有唔同。當年情況好Worse，唔少科網股搵唔到盈利模式。當時雅虎仲係老大哥，個個抄佢，整入門網站，但其實完全搵唔到錢，廣告Cover唔到，所以咪個個都燒錢，當時流行一個Term，叫燒銀紙速度（Burn Rate），邊個燒得勁，股價就升得多。

彩兒：當年嘅瘋癲情況小妹都略有所聞，話說我三姨婆都有排隊抽新股，喺彌敦道仲打咗幾個蛇餅，就係為咗抽tom.com新股，當年呢隻股大幅超購，連張招股申請表都有得炒！聽講一份表最高炒到100蚊！

Kitty：重點係當年真係虛火，搞科技十居其九冇錢賺，咁啲公司錢從何來？自然就係借錢，或者向股東們掠水啦。反而依家唔少科網股年年都賺錢，仲愈賺愈多，現金流幾穩定。你睇下蘋果公司，有兩千幾億美金Cash，真係富可敵國s。點解要加s？因為分分鐘幾個國家加埋都唔夠佢有錢！

鯨吞神話買少見少

彩兒：你話依家嘅科企夠晒真材實料，又有盈利，咁第三個不同之處係咩？

Kitty：就係當年最興「虛冚實」，以有形吞無形，聽落好似功夫口訣，其實啲公司只靠互聯網概念去壯大市值，從而鯨吞一啲傳統兼有實體資產嘅巨企。當年最經典一役，就必定係美國在線（AOL）用1,640億美元併購時代華納（Time Warner），呢單刁更被譽為「世紀婚禮」。香港選手都唔曳，盈科數碼動力靠巨額借貸鯨吞香港電訊，合併成為電訊盈科（00008），搖身一變成為市值超過三千億元、香港市值第四大嘅上市公司。不過，勉強冇幸福，兩者同樣慘淡收場，市值最終勁縮水。久而久之，呢類鯨吞神話買少見少，加上依家間間科企都咁疊水，風險都會細得多。

彩兒：聽落又真係幾大分別，都係大姐你睇得通透，但小妹睇得出至少有一點係同當年一樣，就係你同我仲未嫁得出！

既然話科網股股災2.0暫時發生嘅機會細，咁即係可以放眼喺科網股，到底有乜大魚可撈？

港股睇騰訊 美市吼fb

馮：豐盛金融資產管理部分析員 馮宏遠

彩兒：最近班股友日日開口埋口都講「科技三寶」，咁鬼Hit，究竟係咪長升長有先？

馮：咁嘅名係咪你改？哈哈！你應該係講緊騰訊、瑞聲同舜宇囉……Overall都炒到誇張，所以先多人提啦，騰訊進入高速增長期，除咗手機遊戲收入外，依家支付業務成為新嘅催化劑，而且BAT（百度、阿里、騰訊）之中，百度現時光芒褪色，阿里嘅支付寶同騰訊微信支付就平分秋色，港股市場就只可買到騰訊，佢又係權重股，而且一般睇好科技板塊嘅基金都唔會敢沽佢，依家實在好難估佢下一步上咩位，技術阻力位係250元，依家整體沽壓唔重，只係恒指回軟先有人沽吓佢，所以佢係科技三寶中我最睇好嘅一隻。

至於瑞聲同舜宇，我只會視佢哋為蘋果公司（美股：AAPL）概念股或手機零件股。舜宇除咗蘋果公司概念股之外，仲有VR（虛擬實境）概念，同埋車用鏡頭嘅業務，都會成為推升股價嘅動力；瑞聲呢，就會受惠市傳iPhone 8會有雙鏡頭，對係iPhone鏡頭供應商嘅佢有好處，勢推升毛利率。市場主要憧憬iPhone 8會有革新設計，加上iPhone 7過去一季銷售唔掂，累積購買力會令iPhone 8賣得好，呢個原因都推升蘋果公司股價，零件股又跟住升，但要小心股份可能調整！

Apple瑞聲舜宇恐回調

Kitty：嘩，睇嚟蘋果公司iPhone 8真係要千呼萬喚嘔出嚟喇，如果唔係，瑞聲同舜宇呢兩寶加埋蘋果公司股價都凍過水！

馮：係呀，因為iPhone 7過去財季銷售遜預期，已經令蘋果公司買盤動力減少，而且管理層仲冇講明iPhone 8幾時出，近排市場有懷疑今年未必出到iPhone 8嘅聲音，瑞聲或回調至100元，舜宇就會落番62元先再上路。至於蘋果公司，就要睇佢iPhone 8會唔會如期出喇，若期望落空，有機會先下試130美元。

fb或145美元整固後再上

彩兒：你依家最睇好邊隻科網巨擘，蘋果公司暫時唔掂，邊個可以撐住納指先呀？

馮：睇咗呢一轉美國科網巨擘業績，我最Like就係facebook，佢連埋旗下Instagram，依家每月活躍用戶有20億，主要係歐美富裕地區用戶，且佢盈利表現勝預期，以佢規模嚟講，咁高速增長嘅股份選擇真係唔多，公司現時將廣告模式轉變為影片廣告，以增加廣告收入，而非一味增加廣告，值得繼續追捧，相信佢喺145美元整固後有力再上。

Kitty：Yeah！我最鍾意玩Instagram喇。

Kitty、彩兒