Market Insight：舜宇可炒染藍概念

蘋果公司股價能夠拗腰，主要係華爾街相信首三個月滯銷只係短暫性質，等傳統六月公布九月派街的新iPhone登場，銷售便會回升。

兩隻蘋果概念股上周跌幅唔算多，如果本周見企得穩，六月之前仲係玩得過，尤其百麗國際（01880）私有化，舜宇多咗個染藍概念炒，可以望多兩眼。

股神巴郡的股東會，近年都有股東提問關於中國市場投資潛力，今年副主席芒格照舊為A股面上貼金，認為中國股市前途光明，現時也比美國股市便宜。

股神撐A股講多過做

其實講到天花龍鳳都無意思，銀紙唔會講大話，咁多年嚟，股神在華投資，數來數去都係早已食胡的中石油（00857）以及比亞迪股份（01211）兩隻，投機味濃的A股，始終唔係投資年期長到無朋友，今日仲可以奉行buy and hold的股神嗰杯茶。

歐元更上層樓有難度

上周中恒指突破三月中高位24,656點，去到24,773點港股大時代之後的新高，最終破位唔升，未見淡友群起冚倉已暗叫棹忌，結果臨周末即見腳軟，恒指插207點收報24,476點。

近期個市，經常出現個別重磅股像騰訊（00700）或友邦保險（01299）等輪流頂住指數，其他股份跟唔上的情況，難免令對升市質素抱有懷疑。

個市外強中乾的另一個特徵，係國指異常弱勢，上周五已低見三個月新低，連9,935點的頭肩頂頸線都穿埋，走勢認真麻麻。

古勝執筆時未知法國大選結果，不過由去年英國脫歐公投，以至美國總統大選，均反映大市對政治事件爆冷的寬容程度，即使有意想不到的結局，相信對個市影響極其短暫。

反而走中間路線的馬克龍即使大熱勝出，能否令近排已累積反彈唔少、兌美元去到1.1算的歐元更上一層樓，這點在下反而有所保留，如果今朝見1.12至1.13的癲價出現，反手沽歐元相信勝算更大。

市場唔驚美國縮表？

美國上月就業數據扭轉三月的頹風，數據之後，聯儲局六月再加息四分一厘已無懸念，大家可以疊埋心水，聽聽下半年聯儲局就「縮表」規模的意向。

周末，聖路易聯儲銀行行長布拉德率先拋出目標，認為資產負債表應由現時4.5萬億美元縮至2萬億美元，同場的波士頓及三藩市聯儲銀行行長都認同布拉德的睇法。

資產價格不動如山

美聯儲局由退市到加息，由加息到縮表，環球股市以至資產價格市場，依然不為所動，堪稱奇景！到底資本市場太過坐定粒六，抑或係牛市尾聲漠視任何不利消息的傳統？恕古勝都無答案畀到大家。

上周香港樓市指數再升，已連升11個星期再創歷史新高，近期本地一手樓真係誇張，遠至沙頭角禁區都可以賣近十球，打工仔無錢唔通真係要搬上火星乎？

古勝