絲絲講場：富豪御用經紀 炒股四個不
證券界老行尊話，投資唔好一味信晒技術分析！聽唔入耳？所以你唔係富豪囉。香港證券業協會創會主席董偉係香港好多富豪嘅御用經紀，佢就係靠穩陣，縱橫股市超過半世紀。佢同絲絲分享多年來累積嘅心得，仲提醒絲絲千祈唔好借錢炒股！
董偉語重心長話，拎自己嘅錢去投資輸盡都係本金，借錢投資以小博大炒燶咗就未必可以填到氹。
董偉退休 眷戀股壇
「買大隻有實力嘅股票都可以賺錢，唔使一定去做沽空或者買賣牛熊證、窩輪！」市場上有好多衍生工具，董偉覺得風險大建議少掂為妙，如期指涉及高水同低水等等交易操作，話好多客「初初有啲錢賺，但之後全部輸晒」。
好想掂衍生工具？得，不過佢認為呢啲投資只係啱啲「成日睇住個市、留意不同買賣嘅人」。他唔建議做沽空，因為比起平時嘅交易風險可能大10倍、甚至20倍。
講過「太鍾意呢一行」嘅董偉今年已經八十八歲，過去做過胃同腦部大手術，佢話好彩兩個難關都過咗，今年三月初迎來退休生活。
「三個仔女都各有事業，冇一個做呢行，唔係點捨得將幾十年心血放手」，董偉將一手建立嘅眾利股票交托畀好朋友，自己完全退下火線，依家得閒就練氣功、唱戲等。不過佢仲保留舊辦公室，得閒就招呼朋友去坐，交流吓心得。絲絲睇，佢又點捨得股壇吖！
余絲韻